កងកម្លាំងរដ្ឋាភិបាលស៊ីរីកំពុងបន្តរុលទៅមុខឆ្ពោះកាន់ទីក្រុង Raqqa ដែលជាបន្ទាយសំខាន់របស់កងកម្លាំងប្រជាធិបតេយ្យស៊ីរី (SDF) ដឹកនាំដោយជនជាតិឃឺដ និងទទួលបានការគាំទ្រពីសហរដ្ឋអាមេរិក បន្ទាប់ពីបានដណ្តើមយកទីក្រុងយុទ្ធសាស្ត្រ Tabqa និងអាកាសយានដ្ឋានយោធារបស់ខ្លួននៅលើទន្លេ Euphrates។
ប្រភពពីសារព័ត៌មានAL Jazeera នៅថ្ងៃទី១៨ខែមករា។
កងទ័ពស៊ីរីក៏បានគ្រប់គ្រងទំនប់ Euphrates ឬទំនប់ Tabqa ដែលស្ថិតប្រហែល ៥០ គីឡូម៉ែត្រភាគខាងលិចទីក្រុង Raqqa បន្ទាប់ពីការប្រយុទ្ធយ៉ាងខ្លាំងជាមួយកងកម្លាំង SDF។ តំបន់ Raqqa ស្ថិតក្រោមការគ្រប់គ្រងរបស់ SDF ចាប់តាំងពីឆ្នាំ ២០១៥ ហើយបច្ចុប្បន្ន កងកម្លាំងរដ្ឋាភិបាលកំពុងប្រមូលផ្តុំសម្ភារៈយោធាធុនធ្ងន់ ដើម្បីបន្តការវាយលុក។
ភាពតានតឹងបានកើនឡើង បន្ទាប់ពីការចរចាដើម្បីរួមបញ្ចូលយុទ្ធជនឃឺដចូលក្នុងកងទ័ពជាតិស៊ីរីបានជាប់គាំង ដែលនាំឲ្យមានការប៉ះទង្គិចគ្នារវាងភាគីទាំងពីរ នៅទីក្រុង Aleppo កាលពីដើមខែមករា និងនៅតំបន់ផ្សេងៗទៀត។
ទោះជាយ៉ាងណា ការរុលទៅមុខរបស់កងទ័ពស៊ីរីបានបង្កការព្រួយបារម្ភថា ជម្លោះនៅភាគខាងជើងប្រទេសស៊ីរីអាចនឹងកាន់តែធ្ងន់ធ្ងរឡើង៕