អាជ្ញាធរអូទ្រីសបានអះអាងថា អ្នកជិះស្គីចំនួន ៥ នាក់បានស្លាប់ ក្នុងហេតុការណ៍រអិលបាក់ដីពីរលើក ដែលកើតឡើងនៅតំបន់ Salzburg Pongau ភាគខាងលិចប្រទេសអូទ្រីស កាលពីថ្ងៃសៅរ៍។
ប្រភពពីសារព័ត៌មានAP នៅថ្ងៃទី១៨ខែមករា។
ហេតុការណ៍ដំបូងនៃការរអិលព្រិលនៅតំបន់ Gastein Valley ភាគខាងត្បូងទីក្រុង Salzburg បានបោកបក់អ្នកជិះស្គី ៧ នាក់ បណ្តាលឲ្យ ៤ នាក់ស្លាប់ និងពីរនាក់រងរបួសក្នុងនោះម្នាក់របួសធ្ងន់ធ្ងរ ខណៈមនុស្សម្នាក់ទៀតអាចរត់គេចខ្លួនបានដោយគ្មានរបួស។
ប្រហែល ៩០ នាទីបន្ទាប់ មានហេតុការណ៍រអិលព្រិលមួយទៀតនៅតំបន់ Bad Hofgastein ក្បែរនោះ ដែលមានកម្ពស់ប្រហែល ២,២០០ ម៉ែត្រ បណ្តាលឲ្យអ្នកជិះស្គីស្រីម្នាក់ស្លាប់ បន្ទាប់ពីត្រូវបានកប់ក្រោមព្រិល។
ប្រធានសេវាជួយសង្គ្រោះភ្នំ Pongau លោក Gerhard Kremser បានព្រមានថា ស្ថានភាពរអិលព្រិលនៅពេលនេះមានហានិភ័យខ្ពស់ខ្លាំង ទោះបីមានការព្រមានជាច្រើនលើកកន្លងមកក៏ដោយ។ អាជ្ញាធរបានប្រើឧទ្ធម្ភាគចក្រជួយសង្គ្រោះ ក្រុមជួយសង្គ្រោះភ្នំ ក្រុមឆ្កែស្វែងរក និងក្រុមអន្តរាគមន៍វិបត្តិ ដើម្បីឆ្លើយតបទៅនឹងហេតុការណ៍នេះ៕