ប្រធានាធិបតីចិន លោក ស៊ី ជីនពីង និងនាយករដ្ឋមន្ត្រីចក្រភពអង់គ្លេស លោក Keir Starmer បានយល់ព្រមពង្រឹងទំនាក់ទំនងសេដ្ឋកិច្ច និងជំរុញភាពជាដៃគូយុទ្ធសាស្ត្រឲ្យកាន់តែជិតស្និទ្ធ ក្នុងអំឡុងកិច្ចប្រជុំទ្វេភាគីនៅទីក្រុងប៉េកាំង។
ប្រភពពីសារព័ត៌មានAl Jazeera នៅថ្ងៃទី២៩ខែមករា។
ដំណើរទស្សនកិច្ចនេះគឺជាលើកដំបូងរបស់មេដឹកនាំអង់គ្លេសទៅប្រទេសចិនក្នុងរយៈពេលប្រាំបីឆ្នាំ ហើយត្រូវបានមើលឃើញថាជាសញ្ញានៃការធូរស្រាលទំនាក់ទំនងដែលធ្លាប់តានតឹង។
លោក Starmer បានបញ្ជាក់ថា ការធ្វើអាជីវកម្មជាមួយចិនគឺជាជម្រើសចាំបាច់សម្រាប់ចក្រភពអង់គ្លេស ដោយអំពាវនាវឲ្យមានទំនាក់ទំនងយូរអង្វែងជាមួយសេដ្ឋកិច្ចធំទីពីររបស់ពិភពលោក។ លោកក៏បានសង្កត់ធ្ងន់ថា ភាគីទាំងពីរគួរសហការលើវិស័យដែលមានផលប្រយោជន៍រួម ដូចជាការប្រែប្រួលអាកាសធាតុ និងស្ថិរភាពសកល ខណៈដែលនៅតែអនុញ្ញាតឲ្យមានការសន្ទនាត្រង់ទៅត្រង់លើបញ្ហាដែលមានការមិនយល់ស្រប។
ខាងលោក ស៊ី ជីនពីង បានអំពាវនាវឲ្យមានការពង្រឹងការសន្ទនា និងកិច្ចសហប្រតិបត្តិការ បន្ទាប់ពីលោកបានបញ្ជាក់ថា ស្ថានភាពអន្តរជាតិបច្ចុប្បន្នមានភាពស្មុគស្មាញ និងជាប់ទាក់ទងគ្នា។ លោកបានបញ្ជាក់ថា មេដឹកនាំគួរតែឈានទៅមុខដោយក្លាហានក្នុងការធ្វើអ្វីដែលត្រឹមត្រូវសម្រាប់ផលប្រយោជន៍ប្រទេស និងប្រជាជនរបស់ខ្លួន៕