សហរដ្ឋអាមេរិកបានយល់ព្រមតាមសំណើរបស់អ៊ីរ៉ង់ ក្នុងការផ្លាស់ប្តូរទីតាំងកិច្ចពិភាក្សានុយក្លេអ៊ែរដែលគ្រោងធ្វើឡើងពីប្រទេសទួរគី ទៅកាន់ប្រទេសអូម៉ង់ មុនកិច្ចប្រជុំដែលរំពឹងថានឹងប្រព្រឹត្តទៅនៅថ្ងៃសុក្រខាងមុខនេះ។
ប្រភពពីសារព័ត៌មានRoyalnews នៅថ្ងៃទី៤ខែកុម្ភៈ។
ប្រភពក្នុងតំបន់បានបញ្ជាក់ថា អ៊ីរ៉ង់ចង់ឱ្យការចរចាមានទម្រង់ទ្វេភាគី និងផ្តោតតែទៅលើបញ្ហានុយក្លេអ៊ែរប៉ុណ្ណោះ ខណៈដែលសហរដ្ឋអាមេរិកចង់ពង្រីករបៀបវារៈឱ្យរួមបញ្ចូលបញ្ហាមីស៊ីលផ្លោង និងសកម្មភាពរបស់ក្រុមសម្ព័ន្ធមិត្តអ៊ីរ៉ង់នៅក្នុងតំបន់ផងដែរ។ ការខ្វែងគំនិតលើទម្រង់ និងវិសាលភាពនេះ បានធ្វើឱ្យមានសំណួរអំពីដំណើរការនៃកិច្ចប្រជុំ។
ការផ្លាស់ប្តូរទីតាំងចរចានេះកើតឡើងនៅពេលដែលភាពតានតឹងនៅមជ្ឈិមបូព៌ាកំពុងកើនឡើង ដោយសហរដ្ឋអាមេរិកបានបង្កើនវត្តមានយោធារបស់ខ្លួនក្នុងតំបន់។ កាលពីថ្ងៃអង្គារ យោធាអាមេរិកបានបាញ់ទម្លាក់ដ្រូនរបស់អ៊ីរ៉ង់មួយគ្រឿង ដែលបានចូលទៅជិតនាវាផ្ទុកយន្តហោះ Abraham Lincoln នៅក្នុងសមុទ្រអារ៉ាប់៕