អាជ្ញាធរប៉ាគីស្ថានបានដាក់ពង្រាយឧទ្ធម្ភាគចក្រនិងដ្រូន ដើម្បីបញ្ចប់ការប្រឈមមុខដាក់គ្នាជាមួយក្រុមសកម្មប្រយុទ្ធនៅតំបន់វាលខ្សាច់ក្នុងខេត្ត Balochistan ដែលបណ្តាលឱ្យមនុស្សយ៉ាងតិច ៥៨ នាក់ស្លាប់។
ប្រភពពីសារព័ត៌មានReuters នៅថ្ងៃទី៤ខែកុម្ភៈ។
យោងតាមមន្ត្រីសន្តិសុខ ការវាយប្រហារនេះត្រូវបានចាត់ទុកថាជាការវាយប្រហារដ៏ធំបំផុតមួយរបស់ក្រុមឧទ្ទាមក្នុងខេត្តនេះក្នុងរយៈពេលថ្មីៗ។ កងកម្លាំងសន្តិសុខបានប្រើដ្រូននិងឧទ្ធម្ភាគចក្រ ដើម្បីបណ្តេញក្រុមសកម្មប្រយុទ្ធចេញពីតំបន់ទីក្រុង និងមូលដ្ឋានសន្តិសុខមួយចំនួន។
នៅទីក្រុង Quetta មានរូបភាពបង្ហាញពីយានយន្តដែលខូចខាតនៅស្ថានីយ៍ប៉ូលីស បន្ទាប់ពីការវាយប្រហាររបស់ក្រុមសកម្មប្រយុទ្ធកាលពីថ្ងៃទី ១ ខែកុម្ភៈ។ អាជ្ញាធរបញ្ជាក់ថា ទោះបីជាកងកម្លាំងសន្តិសុខបានគ្រប់គ្រងស្ថានការណ៍នៅតំបន់សំខាន់ៗមួយចំនួនក៏ដោយ ការប្រយុទ្ធគ្នានៅតែបន្តនៅក្នុងតំបន់ខ្លះនៃខេត្ត Balochistan៕