(បន្ទាយមានជ័យ)៖ ផ្ទះសំណាក់ទំហំ ៨៨ម៉ែត្រx៣០ម៉ែត្រ បានរងការខូចខាតទាំងស្រុង ខណៈផ្ទះ១ខ្នងទៀត ខូចខាតកម្រិតធម្យម..!។
ក្នុងករណីអគ្គីភ័យឆាបឆេះផ្ទះសំណាក់យីហោ ខេមរា និងទីតាំងលក់សំបុត្ររថយន្តក្រុងដឹកអ្នកដំណើរយីហោ កាពីតូល នៅតាមផ្លូវជាតិលេខ ៥ស្ថិតនៅភូមិអូរជ្រៅ សង្កាត់អូជ្រៅ ក្រុងប៉ោយប៉ែត ខេត្តបន្ទាយមានជ័យ កាលពីវេលាម៉ោង ២១:២០នាទីយប់ ថ្ងៃទី០៤ ខែកុម្ភះ ឆ្នាំ២០២៦។
នេះបើយោងតាម របាយការណ៍ពីសមត្ថកិច្ច។
នៅពេលនោះ លោកឧត្តមសេនីយ៍ទោ សិទ្ធិ ឡោះ ស្នងការខេត្តបន្ទាយមានជ័យ បានចាត់តាំងលោកឧត្តមសេនីយ៍ត្រី រ៉ែម វីរ: ស្នងការរង ការងារសេនាធិការ បានដឹកនាំកម្លាំងនគរបាលជំនាញ ពន្លត់អគ្គីភ័យ និងកម្លាំងនគរបាលតាមបណ្តាក្រុង/ស្រុក រួមមានកម្លាំងអធិការដ្ឋាននគរបាលក្រុងប៉ោយប៉ែត ក្រុងសិរីសោភ័ណ ស្រុកអូរជ្រៅ ស្រុកមង្គលបូរី កម្លាំងវរសេនាតូចនគរបាលការពារព្រំដែនតូចលេខ៩១១,៨៩១ នាំយករថយន្តទឹក ចំនួន១១គ្រឿង កម្លាំងសរុប១៥០នាក់ សហការជាមួយអាជ្ញាធរមូលដ្ឋាន សមត្ថកិច្ចពាក់ព័ន្ធ ក្រុមពន្លត់អគ្គីភ័យមកពីបណ្តាក្រុមហ៊ុនកាស៊ីណូ ចុះជួយអន្តរាគមន៍ពន្លត់ទីតាំងកើតហេតុ។
ប្រតិបត្តិការជួយពន្លត់អគ្គីភ័យនេះ នគរបាល បានប្រើប្រាស់រថយន្តដឹកទឹកចំនួន១១គ្រឿង ទឹកចំនួន១៩ធុង រហូតដល់ម៉ោង១១យប់ទើប ភ្លើងបានរលត់ទាំងស្រុង និងគ្រប់គ្រងបាន១០០ភាគរយ មិនឆេះរាលដល់ទៅកន្លែងដ៏ទៃទៀត។
ហេតុការនេះ មិនបានបណ្តាលឲ្យបានជនណាម្នាក់ស្លាប់បាត់បង់ជីវិតទេ មានតែពលរដ្ឋម្នាក់រងរបួសស្រាលត្រូវបានបញ្ជូនទៅសង្គ្រោះភ្លាមៗ។
ផ្ទះចំនួន២ទីតាំង ដែលមួយទីតាំងមានទំហំ ៨៨ម៉ែត្រx៣០ម៉ែត្រ ត្រូវបានភ្លើងឆេះទាំងស្រុង៕