អារ៉ាប៊ីសាអូឌីត និងសហរដ្ឋអាមេរិកបានធ្វើសមយុទ្ធកងទ័ពជើងទឹករួមគ្នា នៅមូលដ្ឋានទ័ពជើងទឹក King Faisal ក្នុងទីក្រុង Jeddah ភាគខាងលិចប្រទេសអារ៉ាប៊ីសាអូឌីត។ ក្រសួងការពារជាតិអារ៉ាប៊ីសាអូឌីតបានឲ្យដឹងថា សមយុទ្ធដែលមានឈ្មោះថា Blue Defender 26 មានគោលបំណងបង្កើនកិច្ចសហប្រតិបត្តិការយោធា និងការផ្លាស់ប្តូរជំនាញរវាងកងកម្លាំងទាំងពីរ។
ប្រភពពីសារព័ត៌មានAnadolu Agency នៅថ្ងៃទី៩ខែកុម្ភៈ។
ក្រសួងបានបញ្ជាក់ថា សមយុទ្ធនេះរួមមានការអនុវត្តសេណារីយ៉ូសមរភូមិ និងយុទ្ធសាស្ត្រផ្សេងៗ ដែលបង្ហាញពីវិជ្ជាជីវៈ និងការត្រៀមខ្លួនប្រយុទ្ធកម្រិតខ្ពស់របស់កងទ័ពទាំងពីរ ដើម្បីពង្រឹងសមត្ថភាពប្រតិបត្តិការរួម និងសន្តិសុខដែនសមុទ្រ។
សមយុទ្ធនេះត្រូវបានធ្វើឡើងក្នុងបរិបទនៃការពង្រឹងទំនាក់ទំនងយុទ្ធសាស្ត្ររវាងទីក្រុងរីយ៉ាដ និងទីក្រុងវ៉ាស៊ីនតោន បន្ទាប់ពីប្រទេសទាំងពីរបានចុះហត្ថលេខាលើកិច្ចព្រមព្រៀងជាច្រើនវិស័យ រួមទាំងវិស័យការពារជាតិ ដែលមានតម្លៃសរុបប្រមាណ ២៧០ ពាន់លានដុល្លារ៕