តុលាការហុងកុងបានកាត់ទោសអតីតមហាសេដ្ឋីប្រព័ន្ធផ្សព្វផ្សាយ និងអ្នកគាំទ្រលទ្ធិប្រជាធិបតេយ្យ លោក Jimmy Lai ដោយផ្តន្ទាទោសឱ្យជាប់ពន្ធនាគារ 20 ឆ្នាំ ក្រោមច្បាប់សន្តិសុខជាតិដែលដាក់ដោយប្រទេសចិន។
ប្រភពពីសារព័ត៌មានAP នៅថ្ងៃទី៩ខែកុម្ភៈ។
លោក Lai អាយុ 78 ឆ្នាំ ត្រូវបានរកឃើញមានកំហុសពីបទឃុបឃិតជាមួយកងកម្លាំងបរទេស ដើម្បីប៉ះពាល់ដល់សន្តិសុខជាតិ និងឃុបឃិតបោះពុម្ពផ្សាយអត្ថបទញុះញង់។ ជនជាប់ចោទរួម រួមមានអតីតបុគ្គលិកកាសែត Apple Daily និងសកម្មជនមួយចំនួន ទទួលទោសជាប់ពន្ធនាគារចន្លោះពី 6 ឆ្នាំ3ខែ ដល់10 ឆ្នាំ។
ការកាត់ទោសនេះបានបង្កើនការព្រួយបារម្ភអំពីការធ្លាក់ចុះនៃសេរីភាពសារព័ត៌មាននៅហុងកុង ខណៈរដ្ឋាភិបាលអះអាងថា ករណីនេះមិនពាក់ព័ន្ធនឹងសេរីភាពសារព័ត៌មានទេ។ការផ្តន្ទាទោសនេះរងការរិះគន់ពីសហរដ្ឋអាមេរិក និងចក្រភពអង់គ្លេស ហើយអាចបង្កើនភាពតានតឹងការទូតរវាងទីក្រុងប៉េកាំង និងប្រទេសលិច៕