អ៊ុយក្រែន និង សមាគមប្រជាជាតិអាស៊ីអាគ្នេយ៍ (អាស៊ាន) បានពិភាក្សាអំពីការជំរុញកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមក និងការពង្រឹងកិច្ចសន្ទនា ក្នុងអំឡុងពេលជួបប្រជុំគ្នានៅក្រៅកិច្ចប្រជុំ សន្និសីទសន្តិសុខទីក្រុងមុយនិច។
ប្រភពពីសារព័ត៌មានAnadolu នៅថ្ងៃទី១៥ខែកុម្ភៈ។
រដ្ឋមន្ត្រីការបរទេសអ៊ុយក្រែន លោកAndrii Sybiha បានជួបជាមួយអគ្គលេខាធិការអាស៊ាន កៅ គីមហួន ដើម្បីពិភាក្សាអំពីការពង្រីកកិច្ចសហប្រតិបត្តិការនៅវិស័យសន្តិសុខស្បៀងអាហារ ថាមពល និងឌីជីថលូបនីយកម្ម។ លោក Sybiha បានលើកឡើងថា អាស៊ានគឺជាដៃគូសំខាន់របស់អ៊ុយក្រែន ក្នុងស្ថាបត្យកម្មអន្តរជាតិសព្វថ្ងៃ ហើយបានបញ្ជាក់ពីបំណងរបស់ទីក្រុងគៀវក្នុងការក្លាយជាដៃគូសន្ទនាតាមវិស័យជាមួយអាស៊ាន។
ភាគីទាំងពីរបានបង្ហាញការប្តេជ្ញាចិត្តក្នុងការលើកកម្ពស់ទំនាក់ទំនង និងពង្រីកការចូលរួមជាក់ស្តែង។ លោក Sybiha ក៏បានអញ្ជើញអគ្គលេខាធិការអាស៊ានឲ្យទៅបំពេញទស្សនកិច្ចនៅអ៊ុយក្រែនផងដែរ៕