កាលពីថ្ងៃទី១៦ ខែកុម្ភៈ កងកម្លាំងឆ្មាំបដិវត្តន៍អ៊ីរ៉ង់ IRGC បានចាប់ផ្តើមការធ្វើសមយុទ្ធយោធា នៅតំបន់ច្រកសមុទ្រ Hormuz មុនកិច្ចពិភាក្សាជុំថ្មី ត្រូវធ្វើឡើងជាមួយសហរដ្ឋអាមេរិក។
សារព័ត៌មាន AFP។
ទូរទស្សន៍រដ្ឋអ៊ីរ៉ង់ រាយការណ៍ថា សមយុទ្ធយោធាខាងលើ ដែលមិនត្រូវបានបញ្ជាក់រយៈពេល។
គឺមានគោលដៅត្រៀមលក្ខណៈកងកម្លាំងឆ្មាំបដិវត្តន៍ ដើម្បីទប់ទល់ការគំរាមកំហែងសន្តិសុខនិងយោធាដែលអាចកើតមានឡើង នៅច្រកសមុទ្រ Hormuz។
បន្ទាប់ពីអាមេរិក ដាក់ពង្រាយកម្លាំងជើងទឹកទ្រង់ទ្រាយធំ មានទាំងនាវាផ្ទុកយន្តហោះចម្បាំង មកកាន់មជ្ឈិមបូព៌ា។
អ្នកនយោបាយអ៊ីរ៉ង់ ធ្លាប់បានគំរាមម្តងហើយម្តងទៀត អំពីការបិទខ្ទប់ច្រកសមុទ្រខាងលើ ជាច្រកផ្លូវទឹកដ៏សំខាន់មួយ ដែល២០ភាគរយនៃប្រេងផលិតលើពិភពលោក ត្រូវដឹកជញ្ជូនឆ្លងកាត់។
ទីក្រុងតេហេរ៉ង់ និងទីក្រុងវ៉ាស៊ីនតោន នឹងបើកកិច្ចពិភាក្សាជុំថ្មីទៀត នៅទីក្រុងហ្សឺណែវនៃប្រទេសស្វ៉ីស នាថ្ងៃអង្គារនេះ ដែលសម្របសម្រួលដោយអូម៉ង់។
ប្រទេសទាំងពីរ បានបន្តកិច្ចចរចាឡើងវិញ កាលពីថ្ងៃទី៦ ខែកុម្ភៈ នៅអូម៉ង់ ដែលជាលើកដំបូង ចាប់តាំងពីកិច្ចប្រឹងប្រែងការទូតបានដួលរលំ កាលពីខែមិថុនា ឆ្នាំ២០២៥ អំឡុងសង្រ្គាមផ្លូវអាកាសរវាងអ៊ីរ៉ង់និងអ៊ីស្រាអែល ដែលពេលនោះ អ៊ីស្រាអែល និងអាមេរិក បានទម្លាក់គ្រាប់បែកលើមូលដ្ឋានចម្រាញ់នុយក្លេអ៊ែររបស់អ៊ីរ៉ង់។
ប្រធានាធិបតីអាមេរិក លោក ដូណាល់ ត្រាំ បានបង្កើនសម្ពាធឱ្យអ៊ីរ៉ង់ ឈានដល់កិច្ចព្រមព្រៀងមួយ ។
ដោយរូបលោកបានដាក់ពង្រាយកងកម្លាំងជើងទឹកធំសម្បើម មកកាន់តំបន់មជ្ឈិមបូព៌ា។
បន្ទាប់ពីបានបញ្ជូននាវាផ្ទុកយន្តហោះចម្បាំង Abraham Lincoln មកតំបន់ឈូងសមុទ្រនៅមជ្ឈិមបូព៌ា កាលពីខែមករា ។
លោក ត្រាំ និយាយកាលពីថ្ងៃសុក្រសប្តាហ៍មុនថា នាវាផ្ទុកយន្តហោះចម្បាំងទី២ គឺ Gerald R Ford នឹងចេញដំណើរឆ្ពោះមកមជ្ឈិមបូព៌ាបន្ថែមទៀត៕