កាលពីថ្ងៃទី19 ខែកុម្ភៈ ឆ្នាំ2026 ប៉ូលីសអាហ្វ្រិកខាងត្បូងបានចាប់ខ្លួនលោក Bellarmine Chatunga Mugabe កូនប្រុសពៅរបស់អតីតប្រធានាធិបតីហ្ស៊ីមបាវ៉េ Robert Mugabe បន្ទាប់ពីមានករណីបាញ់ប្រហារនៅផ្ទះរបស់លោកក្នុងទីក្រុង Johannesburg។
ប្រភពពីសារព័ត៌មានAP នៅថ្ងៃទី២០ខែកុម្ភៈ។
មេធាវីគ្រួសារបានបញ្ជាក់ថា លោក Mugabe ជាម្នាក់ក្នុងចំណោមបុរសពីរនាក់ដែលត្រូវបានឃុំខ្លួន និងសួរចម្លើយកាលពីថ្ងៃព្រហស្បតិ៍។ ប៉ូលីសបានឲ្យដឹងថា ជនសង្ស័យទាំងពីរនឹងប្រឈមមុខនឹងការចោទប្រកាន់ពីបទប៉ុនប៉ងឃាតកម្ម បន្ទាប់ពីអ្នកថែសួនម្នាក់ត្រូវបានបាញ់រងរបួសធ្ងន់ដោយគ្រាប់កាំភ្លើងមួយគ្រាប់។
វរសេនីយ៍ឯក Dimakatso Nevhuhulwi បាននិយាយថា មូលហេតុនៃការបាញ់ប្រហារនេះមិនទាន់ត្រូវបានកំណត់ ហើយការស៊ើបអង្កេតកំពុងបន្ត។ អាជ្ញាធរមិនបានបញ្ជាក់ថានរណាជាអ្នកបាញ់ និងមិនបានបញ្ចេញឈ្មោះជនសង្ស័យជាផ្លូវការទេ ដោយរង់ចាំការបង្ហាញខ្លួននៅតុលាការ៕