ប្រធានាធិបតីអាហ្វ្រិកខាងត្បូង Cyril Ramaphosa បានប្រកាសថាបុរសអាហ្វ្រិកខាងត្បូង១១នាក់ ដែលត្រូវបានគេ ល្បួងឲ្យចូលរួមប្រយុទ្ធជាមួយកងកម្លាំងរុស្ស៊ីក្នុងសង្គ្រាមនៅអ៊ុយក្រែន នឹងត្រូវបញ្ជូនត្រឡប់មកប្រទេសវិញក្នុងពេលឆាប់ៗនេះ។
ប្រភពពីសារព័ត៌មានAl Jazeera នៅថ្ងៃទី២៥ខែកុម្ភះ។
រដ្ឋាភិបាលទីក្រុងព្រីតូរីយ៉ា បានបញ្ជាក់ថា កាលពីចុងឆ្នាំមុន ខ្លួនបានទទួលការហៅសុំជំនួយពីបុរស១៧នាក់ ដែលត្រូវបានបោកបញ្ឆោតឲ្យចូលរួមជាកងកម្លាំងស៊ីឈ្នួល ហើយជាប់នៅតំបន់ដុនបាស ភាគខាងកើតអ៊ុយក្រែន។ មុននេះ បុរស ៤ នាក់បានវិលត្រឡប់មកដល់ប្រទេសរួចហើយ ខណៈពីរនាក់ទៀតនៅសល់ក្នុងប្រទេសរុស្ស៊ី ម្នាក់ស្ថិតក្នុងមន្ទីរពេទ្យ និងម្នាក់ទៀតកំពុងរង់ចាំដំណើរការត្រួតពិនិត្យមុនត្រឡប់មកវិញ។
អាជ្ញាធរក៏បានបញ្ជាក់ថា ការស៊ើបអង្កេតកំពុងបន្តដើម្បីស្វែងរកយុវជនផ្សេងទៀតដែលបានចូលរួមសកម្មភាពស៊ីឈ្នួល ខណៈច្បាប់អាហ្វ្រិកខាងត្បូងហាមឃាត់ពលរដ្ឋប្រយុទ្ធជាមួយកងទ័ពបរទេស ដោយគ្មានការអនុញ្ញាតពីរដ្ឋាភិបាល៕