ទីភ្នាក់ងារស៊ើបការណ៍សម្ងាត់អ៊ីរ៉ង់ បានបង្ហាញឆន្ទៈបើកចំហ ប្រាប់ទីភ្នាក់ងារស៊ើបការណ៍សម្ងាត់កណ្តាលសហរដ្ឋអាមេរិក(CIA) ដើម្បីចរចាបញ្ចប់សង្គ្រាម ។
នេះបើយោងតាមរបាយការណ៍របស់កាសែត New York Times កាលពីថ្ងៃពុធទី០៤ ខែមីនា ឆ្នាំ២០២៦ ម៉ោងនៅអាមេរិក។
ការផ្តល់ជូននេះ ត្រូវបានធ្វើឡើងតាមរយៈទីភ្នាក់ងារស៊ើបការណ៍សម្ងាត់របស់ប្រទេសមួយ ដែលមិនបញ្ចេញឈ្មោះ ។
នេះបើយោងតាមរបាយការណ៍របស់ NYT ដោយដកស្រង់សម្តីមន្ត្រីមជ្ឈិមបូព៌ា និងមន្ត្រី មកពីប្រទេសលោកខាងលិចមួយដែលបាននិយាយក្នុងលក្ខខណ្ឌមិនបញ្ចេញឈ្មោះ។
ប្រភពមួយមកពីក្រសួងស៊ើបការណ៍សម្ងាត់អ៊ីរ៉ង់ បានបដិសេធរបាយការណ៍នេះថាជា “ការកុហកទាំងស្រុង និងសង្គ្រាមផ្លូវចិត្តនៅកណ្តាលសង្គ្រាម”។
នេះបើយោងតាមរបាយការណ៍របស់ទីភ្នាក់ងារសារព័ត៌មាន ពាក់កណ្តាលផ្លូវការរបស់អ៊ីរ៉ង់ Tasnim។
សេតវិមាន និង CIA មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ។
មន្ត្រីនៅទីក្រុងវ៉ាស៊ីនតោន មានការសង្ស័យថាតើអ៊ីរ៉ង់ ឬរដ្ឋបាលលោក Trump ពិតជាត្រៀមខ្លួនរួចជាស្រេចសម្រាប់ “បញ្ចប់សង្គ្រាម”។
ឯកអគ្គរដ្ឋទូតអ៊ីរ៉ង់ ប្រចាំអង្គការសហប្រជាជាតិ នៅទីក្រុងហ្សឺណែវកាលពីថ្ងៃអង្គារ បានច្រានចោលការចរចាណាមួយជាមួយសហរដ្ឋអាមេរិកសម្រាប់ពេលនេះ។
ប៉ុន្មានថ្ងៃបន្ទាប់ពីសហរដ្ឋអាមេរិក និងអ៊ីស្រាអែល បានបើកការវាយប្រហាររួមគ្នាលើប្រទេសរបស់លោក។
ប្រធានាធិបតី ដូណាល់ ត្រាំ បាននិយាយកាលពីថ្ងៃអង្គារថា ទីក្រុងតេអេរ៉ង់ ចង់ចរចា ប៉ុន្តែវាយឺតពេលហើយ ខណៈដែលសហរដ្ឋអាមេរិក បន្តប្រតិបត្តិការយោធារបស់ខ្លួនប្រឆាំងនឹងអ៊ីរ៉ង់យ៉ាងពេញបន្ទុក៕