ស្ថានការណ៍សង្គ្រាមនៅមជ្ឈិមបូព៌ាកំពុងកើនឡើងយ៉ាងខ្លាំង ខណៈប្រទេសអ៊ីរ៉ង់និងអ៊ីស្រាអែល បន្តវាយប្រហារគ្នាទៅវិញទៅមកហើយបណ្តាប្រទេសនៅតំបន់ឈូងសមុទ្រក៏ត្រូវរងផលប៉ះពាល់ផងដែរ។
ប្រភពពីសារព័ត៌មានAFPនៅថ្ងៃទី៨ខែមីនា។
យោងតាមរបាយការណ៍ព័ត៌មាន អ៊ីរ៉ង់បានបាញ់មីស៊ីល និងដ្រូនទៅកាន់តំបន់ជាច្រើន រួមទាំងប្រទេសគុយវ៉ែត អារ៉ាប៊ីសាអូឌីត និងអ៊ីស្រាអែល។ កងការពារដែនអាកាសនៃប្រទេសទាំងនេះបានព្យាយាមស្ទាក់ចាប់ការវាយប្រហារជាច្រើន។ នៅគុយវ៉ែត ធុងប្រេងនៅអាកាសយានដ្ឋានអន្តរជាតិត្រូវបានវាយប្រហារ ប៉ុន្តែអាជ្ញាធរបានគ្រប់គ្រងអគ្គីភ័យបានរួចរាល់។
ក្នុងពេលដូចគ្នា អ៊ីស្រាអែលបានប្រកាសថា ខ្លួនបានបើកការវាយប្រហារយោធានៅទូទាំងអ៊ីរ៉ង់ដោយកំណត់គោលដៅលើហេដ្ឋារចនាសម្ព័ន្ធយោធា និងទីតាំងសំខាន់ៗនៅទីក្រុងតេអេរ៉ង់។
មន្ត្រីអ៊ីរ៉ង់បានបញ្ជាក់ថា ប្រទេសខ្លួនមានសមត្ថភាពបន្តសង្គ្រាមយ៉ាងខ្លាំងយ៉ាងហោចណាស់រយៈពេល ៦ ខែ ប្រសិនបើការប្រយុទ្ធបន្តកើតមានមិនឈប់៕