តម្លៃប្រេងឆៅពិភពលោកបានកើនឡើងលើស ១០០ ដុល្លារ ក្នុងមួយបារ៉ែល បន្ទាប់ពីសង្គ្រាមរវាងសហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់បានធ្វើឱ្យមានការព្រួយបារម្ភអំពីការរំខានដល់ការផ្គត់ផ្គង់ថាមពលសកល។
ប្រភពពីសារព័ត៌មានAl Jazeera នៅថ្ងៃទី៩ខែមីនា។
ប្រេងឆៅ Brent ដែលជាស្តង់ដារអន្តរជាតិ បានកើនឡើងជាង២០ភាគរយប្រហែល ១១៤ ដុល្លារ ក្នុងមួយបារ៉ែល មុននឹងធ្លាក់ចុះបន្តិចមកនៅជិត ១០៧.៥០ ដុល្លារ នៅព្រឹកថ្ងៃចន្ទ។ នេះជាលើកដំបូងដែលតម្លៃប្រេងឡើងលើស ១០០ ដុល្លារ ចាប់តាំងពីសង្គ្រាមរុស្ស៊ី–អ៊ុយក្រែនក្នុងឆ្នាំ ២០២២។
ការកើនឡើងនេះកើតឡើងបន្ទាប់ពីអ៊ីរ៉ង់បានរារាំងការដឹកជញ្ជូនប្រេងតាម ច្រកសមុទ្រ Hormuz ក្នុងការឆ្លើយតបនឹងការវាយប្រហាររួមរបស់សហរដ្ឋអាមេរិក និងអ៊ីស្រាអែល។ ច្រកសមុទ្រនេះមានសារៈសំខាន់ខ្លាំង ព្រោះប្រហែលមួយភាគប្រាំនៃប្រេងពិភពលោកត្រូវឆ្លងកាត់ទីនោះ។
ក្នុងពេលតែមួយ ប្រទេសផលិតប្រេងធំៗដូចជា អ៊ីរ៉ាក់ អេមីរ៉ាតអារ៉ាប់រួម និងគុយវ៉ែត ក៏បានកាត់បន្ថយការផលិត ដោយសារការដឹកជញ្ជូនត្រូវបានរាំងខ្ទប់។
ទោះជាយ៉ាងណា ប្រធានាធិបតីអាមេរិក Donald Trump បាននិយាយថា ការកើនឡើងតម្លៃប្រេងគឺត្រឹមតែបណ្តោះអាសន្ន ហើយរំពឹងថានឹងធ្លាក់ចុះវិញបន្ទាប់ពីស្ថានការណ៍សន្តិសុខនៅតំបន់ត្រូវបានដោះស្រាយ៕