មេដឹកនាំគណបក្សប្រឆាំងនៅប្រទេសជប៉ុន បានអំពាវនាវឱ្យរដ្ឋាភិបាលបើកដំណើរការរោងចក្រថាមពលនុយក្លេអ៊ែរទាំងអស់ឡើងវិញ ដើម្បីដោះស្រាយបញ្ហាថ្លៃអគ្គិសនីដែលកំពុងកើនឡើងដោយសារវិបត្តិសង្គ្រាមអ៊ីរ៉ង់។
ប្រភពពីសារព័ត៌មានReuterនៅថ្ងៃទី៩ខែមីនា។
លោក Yuichiro Tamaki ប្រធានគណបក្សប្រជាធិបតេយ្យដើម្បីប្រជាជន បានលើកឡើងថា ការប្រើប្រាស់ថាមពលនុយក្លេអ៊ែរអាចជួយបន្ថយការពឹងផ្អែកលើប្រេង និងឧស្ម័នពីតំបន់មជ្ឈិមបូព៌ា។
ប្រទេសជប៉ុនពឹងផ្អែកលើការនាំចូលថាមពលពីតំបន់មជ្ឈិមបូព៌ាជាច្រើន ជាពិសេសប្រេងប្រហែល 95% ត្រូវបាននាំចូលពីតំបន់នេះ។ ក្នុងចំណោមនោះ មានភាគច្រើនត្រូវឆ្លងកាត់ច្រកសមុទ្រHormuz ដែលបច្ចុប្បន្នត្រូវបានបិទដោយសារសង្គ្រាម។ ស្ថានភាពនេះធ្វើឱ្យការផ្គត់ផ្គង់ថាមពលមានការលំបាក និងធ្វើឱ្យថ្លៃអគ្គិសនីកើនឡើង។
ដូច្នេះ មេដឹកនាំគណបក្សប្រឆាំងបានស្នើឱ្យរដ្ឋាភិបាលជប៉ុនពិចារណាប្រើប្រាស់ថាមពលនុយក្លេអ៊ែរឡើងវិញ ដើម្បីធានាសុវត្ថិភាពថាមពល និងបន្ថយផលប៉ះពាល់ពីវិបត្តិសង្គ្រាមនៅតំបន់មជ្ឈិមបូព៌ា៕