ប្រធានគណៈកម្មការសហភាពអឺរ៉ុប លោកស្រីUrsula von der Leyen បានថ្លែងថាមិនគួរអាណិតឬសោកស្តាយចំពោះរបបដឹកនាំរបស់ប្រទេសអ៊ីរ៉ង់ទេ ខណៈដែលភាពតានតឹងនៅមជ្ឈិមបូព៌ាកំពុងកើនឡើង បន្ទាប់ពីសហរដ្ឋអាមេរិកនិងអ៊ីស្រាអែល បើកការវាយប្រហារយោធាលើ អ៊ីរ៉ង់។ លោកស្រីបានចោទប្រកាន់របបអ៊ីរ៉ង់ថាបានគាបសង្កត់ប្រជាជនរបស់ខ្លួន និងបង្កអស្ថិរភាពក្នុងតំបន់មជ្ឈិមបូព៌ា។
ប្រភពពីសារព័ត៌មានAnadolu Agency នៅថ្ងៃទី១០ខែមីនា។
តាមការរាយការណ៍ ការវាយប្រហារទ្រង់ទ្រាយធំដែលបានចាប់ផ្តើមនៅថ្ងៃទី 28 ខែកុម្ភៈ បានបណ្តាលឱ្យមានអ្នកស្លាប់ប្រហែល 1,300 នាក់ រួមទាំងមេដឹកនាំកំពូលអ៊ីរ៉ង់ Ali Khamenei ផងដែរ។ ជាការឆ្លើយតប អ៊ីរ៉ង់បានបាញ់មីស៊ីល និងដ្រូនទៅកាន់អ៊ីស្រាអែល និងប្រទេសក្នុងតំបន់ឈូងសមុទ្រ ហើយបានបិទច្រកសមុទ្រHormuz ដែលជាផ្លូវដឹកជញ្ជូនប្រេងដ៏សំខាន់របស់ពិភពលោក។
លោកស្រី Von der Leyen ក៏បានព្រមានថា វិបត្តិនេះកំពុងប៉ះពាល់ដល់វិស័យថាមពល ហិរញ្ញវត្ថុ ពាណិជ្ជកម្ម និងដឹកជញ្ជូនរបស់អឺរ៉ុប។ លោកស្រីបានបញ្ជាក់ថា អឺរ៉ុបមិនអាចពឹងផ្អែកតែលើប្រព័ន្ធច្បាប់អន្តរជាតិដូចមុនទៀតទេ ហើយត្រូវត្រៀមខ្លួនការពារផលប្រយោជន៍របស់ខ្លួនតាមរយៈកិច្ចសហប្រតិបត្តិការសេដ្ឋកិច្ច ការទូត បច្ចេកវិទ្យា និងយោធាជាមួយដៃគូដែលអាចទុកចិត្តបាន៕