ប្រធានាធិបតីទួរគី លោកRecep Tayyip Erdogan ព្រមានថាការរំលោភដែនអាកាសរបស់ទួរគី ដែលធ្វើឡើងដោយអ៊ីរ៉ង់ជាសកម្មភាពមិនអាចលើកលែងទោសបានឡើយ។ហើយទួរគីនឹងចាត់វិធានការចាំបាច់ដើម្បីការពារសុវត្ថិភាពរបស់ខ្លួន។ ការព្រមាននេះត្រូវបានធ្វើឡើងក្នុងការសន្ទនាតាមទូរស័ព្ទជាមួយប្រធានាធិបតីអ៊ីរ៉ង់ Masoud Pezeshkian។
ប្រភពពីសារព័ត៌មានAnadolu Agency នៅថ្ងៃទី១០ខែមីនា។
ក្រសួងការពារជាតិទួរគីបានឲ្យដឹងថា មីស៊ីលផ្លោងមួយគ្រាប់ដែលបាញ់ពីអ៊ីរ៉ង់ បានចូលទៅក្នុងដែនអាកាសទួរគី បន្ទាប់ពីឆ្លងកាត់ប្រទេស ស៊ីរី និង អ៊ីរ៉ាក់ ប៉ុន្តែត្រូវបានប្រព័ន្ធការពារដែនអាកាសរបស់ អង្គការណាតូ ស្ទាក់ចាប់ និងបំផ្លាញបានទាន់ពេល។
លោក Erdogan បានបញ្ជាក់ថា ទួរគីកំពុងទទួលផលប៉ះពាល់អវិជ្ជមានពីជម្លោះក្នុងតំបន់ ទោះបីជាមិនមែនជាភាគីក្នុងសង្គ្រាមក៏ដោយ។ លោកក៏បានអំពាវនាវឱ្យបញ្ឈប់ការកំណត់គោលដៅលើប្រទេសក្នុងតំបន់ និងបើកផ្លូវសម្រាប់ការទូត ដើម្បីបន្ថយភាពតានតឹង៕