សហរដ្ឋអាមេរិក បានអនុម័តកិច្ចព្រមព្រៀងលក់អាវុធមានតម្លៃប្រមាណ១៦.៥ពាន់លានដុល្លារ ទៅកាន់សម្ព័ន្ធមិត្ត នៅតំបន់ឈូងសមុទ្រ រួមមាន អារ៉ាប់រួម (UAE), គុយវ៉ែត និង ហ្ស៊កដានី ខណៈភាពតានតឹងជាមួយ អ៊ីរ៉ង់ កំពុងកើនឡើងខ្លាំង។
ប្រភពពីសារព័ត៌មានAl Jazeera នៅថ្ងៃទី២០ខែមីនា។
តាមការបញ្ជាក់របស់ក្រសួងការបរទេស អាវុធដែលនឹងលក់រួមមានដ្រូន មីស៊ីល ប្រព័ន្ធរ៉ាដា និងយន្តហោះចម្បាំង F-16 Fighting Falcon ដែលមានគោលបំណងបង្កើនសមត្ថភាពការពាររបស់សម្ព័ន្ធមិត្តក្នុងតំបន់។
ក្នុងចំណោមកិច្ចព្រមព្រៀងនេះ ប្រទេសអារ៉ាប់រួមនឹងទទួលបានកញ្ចប់អាវុធមានតម្លៃប្រហែល ៨.៤ ពាន់លានដុល្លារ ខណៈគុយវ៉ែតនឹងទទួលប្រព័ន្ធការពារដែនអាកាស និងមីស៊ីលមានតម្លៃជិត ៨ ពាន់លានដុល្លារ។ ចំណែកហ្ស៊កដានីទទួលបានថវិកាជាង ៧០ លានដុល្លារ សម្រាប់គាំទ្រយន្តហោះ និងគ្រាប់រំសេវ។
ក្រសួងការបរទេសអាមេរិកបានលើកឡើងថា កិច្ចព្រមព្រៀងនេះមានគោលបំណងគាំទ្រសន្តិសុខជាតិ និងពង្រឹងស្ថិរភាពក្នុងតំបន់មជ្ឈិមបូព៌ា៕