ចក្រភពអង់គ្លេស បានយល់ព្រមអនុញ្ញាតឱ្យសហរដ្ឋអាមេរិក ប្រើប្រាស់មូលដ្ឋានទ័ពអាកាសអង់គ្លេស ដើម្បីបើកការវាយប្រហារលើទីតាំងអ៊ីរ៉ង់ ដែលកំណត់គោលដៅច្រកសមុទ្រ Hormuz។
សារព័ត៌មានBBC នៅថ្ងៃទី២១.០៣.២០២៦។
នាយករដ្ឋមន្ត្រី Sir Keir Starmer បានអនុញ្ញាតឱ្យកងកម្លាំងអាមេរិកប្រើប្រាស់មូលដ្ឋានទ័ពអាកាសទាំងនោះ សម្រាប់តែប្រតិបត្តិការការពារប៉ុណ្ណោះ ដើម្បីការពារអ៊ីរ៉ង់ ពីការបាញ់មីស៊ីល ដែលធ្វើឱ្យប៉ះពាល់ផលប្រយោជន៍ ឬជីវិតរបស់អង់គ្លេស!។
វិមាន Downing Street បាននិយាយកាលពីថ្ងៃសុក្រថា រដ្ឋមន្ត្រីបានអនុម័តការពង្រីកគោលដៅ ដើម្បីជួយការពារកប៉ាល់ នៅក្នុងច្រកដឹកជញ្ជូនប្រេងដ៏សំខាន់ ដោយនៅតែឈរលើមូលដ្ឋាននៃ “ការការពារខ្លួនរួមគ្នា”។
ប្រធានាធិបតីអាមេរិក Donald Trump បាននិយាយថា ចក្រភពអង់គ្លេស “គួរតែធ្វើសកម្មភាពលឿនជាងមុន” ។
ខណៈដែលរដ្ឋមន្ត្រីការបរទេសអ៊ីរ៉ង់ Abbas Araghchi បានអះអាងថា Sir Keir “កំពុងធ្វើឱ្យជីវិតរបស់អង់គ្លេសគ្រោះថ្នាក់”។
អ៊ីរ៉ង់បានបាញ់មីស៊ីលផ្លោងពីរគ្រាប់ទៅកាន់ Diego Garcia ប៉ុន្តែគ្មានមីស៊ីលណាមួយបានវាយប្រហារមូលដ្ឋានទ័ពអាកាសរួមគ្នារវាងសហរដ្ឋអាមេរិក និងចក្រភពអង់គ្លេសនៅលើកោះ Chagos ក្នុងមហាសមុទ្រឥណ្ឌានោះទេ ។
នេះបើយោងតាមការចុះផ្សាយរបស់កាសែត Wall Street Journal និង CNN កាលពីយប់មិញនៅថ្ងៃសៅរ៍ ដោយដកស្រង់សម្តីមន្ត្រីអាមេរិកដែលមិនបញ្ចេញឈ្មោះ។
មីស៊ីលមួយ ត្រូវបានគេរាយការណ៍ថាបានបរាជ័យ ក្នុងការហោះហើរ ខណៈពេលដែលមីស៊ីលមួយទៀត ត្រូវបានស្ទាក់ចាប់ដោយនាវាចម្បាំងអាមេរិក។
វាមិនច្បាស់ទេថា តើមីស៊ីលទាំងនោះត្រូវបានបាញ់នៅពេលណា ខណៈដែលយោធាអាមេរិក បានបដិសេធមិនធ្វើអត្ថាធិប្បាយលើហេតុការណ៍នេះ។
ការវាយប្រហារតាមអាកាស ដែលមិនបានសម្រេចនេះ បានកើតឡើងមុនពេលចក្រភពអង់គ្លេស យល់ព្រមអនុញ្ញាតឱ្យសហរដ្ឋអាមេរិក ប្រើប្រាស់មូលដ្ឋានយោធាអង់គ្លេស ដើម្បីវាយប្រហារទីតាំងអ៊ីរ៉ង់ ដែលកំណត់គោលដៅដឹកជញ្ជូនឆ្លងកាត់ច្រកសមុទ្រ៕