ក្រោយបិទច្រកសមុទ្រហ័រមូស ឥឡូវអ៊ីរ៉ង់ព្រមាន បិទច្រកសមុទ្របាបអាល់ម៉ាន់ដេប មួយទៀត ដែលជាផ្លូវឆ្លងកាត់ដ៏សំខាន់មួយ ចូលទៅក្នុងសមុទ្រក្រហម។
អ៊ីរ៉ង់ថានឹងបិទបែបនេះ ប្រសិនបើកងកម្លាំងអាមេរិក បើកការវាយប្រហារថ្មើរជើងលើអ៊ីរ៉ង់។
សារព័ត៌មានAFP នៅថ្ងៃទី០១.០៤.២០២៦។
ច្រកសមុទ្របាបអាល់ម៉ាន់ដេប គឺជាផ្លូវទឹកតូចចង្អៀតមួយ នៅចុងខាងត្បូងនៃសមុទ្រក្រហម ដែលភ្ជាប់វាជាមួយឈូងសមុទ្រអាដិន ក្នុងមហាសមុទ្រឥណ្ឌា។
វាមានប្រវែងប្រហែល 100គីឡូម៉ែត្រ (62ម៉ាយ) និងទទឹង 30គីឡូម៉ែត្រ(18 ម៉ាយ) វាបំបែកប្រទេសយេម៉ែន នៅលើឧបទ្វីបអារ៉ាប់ ពីប្រទេសជីប៊ូទី និងអេរីទ្រា នៅលើស្នែងអាហ្វ្រិក។
ដោយសារសមុទ្រក្រហម ដើរតួជាតំណភ្ជាប់សំខាន់រវាងអឺរ៉ុប និងអាស៊ី ច្រកសមុទ្រនេះ គឺជាផ្លូវដឹកជញ្ជូនដ៏មមាញឹកបំផុត មួយនៅលើពិភពលោក។
រាល់នាវាដឹកប្រេង និងនាវាដឹកទំនិញ ដែលចេញចូលពីមហាសមុទ្រឥណ្ឌា គឺត្រូវឆ្លងកាត់(ច្រកសមុទ្របាបអាល់ម៉ាន់ដេប) ដើម្បីទៅដល់សមុទ្រក្រហម ហើយបន្ទាប់មកព្រែកស៊ុយអេ ជាកន្លែងដែលពួកគេ ចូលទៅក្នុងសមុទ្រមេឌីទែរ៉ាណេ និងច្រាសមកវិញ។
យោងតាមរបាយការណ៍របស់អាជ្ញាធរព្រែកជីកស៊ុយអេ កប៉ាល់ប្រហែល ២៦.០០០គ្រឿង បានឆ្លងកាត់ព្រែកជីកស៊ុយអេក្នុងឆ្នាំ២០២៣។
ប៉ុន្តែចំនួននេះបានធ្លាក់ចុះមកត្រឹម ១២.៧០០គ្រឿងនៅឆ្នាំ២០២៥ បន្ទាប់ពីពួកឧទ្ទាមហ៊ូធី បានវាយប្រហារកប៉ាល់ នៅក្នុងសមុទ្រក្រហម។
រដ្ឋបាលព័ត៌មានថាមពលសហរដ្ឋអាមេរិក (EIA) បាននិយាយថា ១២ ភាគរយនៃការដឹកជញ្ជូនប្រេងពិភពលោក បានឆ្លងកាត់ច្រកសមុទ្របាបអាល់ម៉ាន់ដេប ក្នុងឆមាសទីមួយនៃឆ្នាំ ២០២៣ មុនពេលដែលពួកហ៊ូធីវាយប្រហារនៅពេលក្រោយនៃឆ្នាំនោះ។
ទិន្នន័យដែលបានចេញផ្សាយដោយ EIA បង្ហាញថាបរិមាណប្រេងដែលឆ្លងកាត់ច្រកសមុទ្របាបអាល់ម៉ាន់ដេបក្នុងឆមាសទីមួយនៃឆ្នាំ២០២៥ គឺតិចជាងពាក់កណ្តាលនៃបរិមាណសរុបក្នុងឆ្នាំ២០២៣។
ដោយសារកងកម្លាំងអ៊ីរ៉ង់ បិទច្រកចូលទៅកាន់ឈូងសមុទ្រតាមរយៈច្រកសមុទ្រហ័រមូស ។
ការនាំចេញតាមរយៈកំពង់ផែយ៉ានប៊ូនៃសមុទ្រក្រហមអារ៉ាប៊ីសាអូឌីត បានកើនឡើងប្រហែល៣ដង ដល់កម្រិតខ្ពស់បំផុតប្រហែលបួនលានបារ៉ែលក្នុងមួយថ្ងៃ នេះបើយោងតាមអ្នកវិភាគ រួមទាំងក្រុមស្រាវជ្រាវ Rystad Energy៕