ប្រភពវេជ្ជសាស្ត្របានរាយការណ៍ថា ការវាយប្រហាររបស់អ៊ីស្រាអែលនៅតំបន់ហ្គាហ្សា បានសម្លាប់ជនជាតិប៉ាឡេស្ទីន ៥នាក់ និងធ្វើឱ្យមនុស្ស ៣២នាក់ផ្សេងទៀតរងរបួស។ ជាមួយគ្នានេះ កុមារីអាយុ ៦ឆ្នាំម្នាក់ និងបុរសម្នាក់ ក៏បានស្លាប់ដោយសាររបួសដែលពួកគេបានរងពីការទម្លាក់គ្រាប់បែកមុនៗផងដែរ។
សារព័ត៌មានTRT World នៅថ្ងៃទី២៩ខែតុលា។
នៅតំបន់អាល់ម៉ាវ៉ាស៊ី ក្នុងទីក្រុងរ៉ាហ្វា ភាគខាងត្បូងហ្គាហ្សា ការវាយប្រហារដោយយន្តហោះដ្រូនរបស់អ៊ីស្រាអែល បានសម្លាប់មនុស្ស ៣នាក់ និងធ្វើឱ្យ ១៥នាក់រងរបួស ក្នុងនោះ ៥នាក់រងរបួសធ្ងន់។ ការវាយប្រហារនេះបានកើតឡើងនៅប៉ុស្តិ៍ត្រួតពិនិត្យមួយក្បែរវិហារអ៊ីស្លាម Muawiya ដែលតាមដានទំនិញពាណិជ្ជកម្មឆ្លងកាត់ច្រក Kerem Shalom។
នៅភាគខាងជើងហ្គាហ្សា ទាហានអ៊ីស្រាអែលបានបាញ់សម្លាប់បុរសជនជាតិប៉ាឡេស្ទីនម្នាក់ឈ្មោះ ម៉ាមូដ សាមី អាល់-ហារស អាយុ ២៨ឆ្នាំ នៅតាមផ្លូវអាល់ហាវចា ក្នុងជំរំជនភៀសខ្លួនចាបាលីយ៉ា។
ចំណែកនៅទីក្រុងខាន់យូនីស ភាគកណ្តាលតំបន់ហ្គាហ្សា ការវាយប្រហារដោយយន្តហោះដ្រូនលើដំបូលអគារលំនៅឋាន បានសម្លាប់បុរសម្នាក់ឈ្មោះ ម៉ូហាម៉េដ អាលីយ៉ាន អាល់-បាយ៉ូក អាយុ ៣៣ឆ្នាំ និងធ្វើឱ្យមនុស្ស ៣នាក់ផ្សេងទៀតរងរបួស ក្នុងនោះមានស្ត្រីវ័យចំណាស់ម្នាក់ផងដែរ៕
