ប្រទេសអាមេរិក អង់គ្លេស ជប៉ុន សហភាពអឺរ៉ុប និងសម្ព័ន្ធមិត្តផ្សេងទៀត បានជំរុញឱ្យកូរ៉េខាងជើងបញ្ឈប់កម្មវិធីអភិវឌ្ឍអាវុធនុយក្លេអ៊ែរ និងមីស៊ីលផ្លោង ព្រមទាំងអំពាវនាវឱ្យប្រទេសទាំងអស់អនុវត្តទណ្ឌកម្មរបស់អង្គការសហប្រជាជាតិឱ្យបានពេញលេញ។
សារព័ត៌មានAnadolu Agency។
ក្នុងសេចក្តីថ្លែងការណ៍កាលពីថ្ងៃពុធ ទី២៨ ខែតុលា ប្រទេសទាំងនេះបានបញ្ជាក់ជាថ្មីថា ពួកគេចង់ឱ្យកូរ៉េខាងជើងបោះបង់អាវុធនុយក្លេអ៊ែរទាំងស្រុង ដោយអាចផ្ទៀងផ្ទាត់បាន និងមិនអាចអភិវឌ្ឍឡើងវិញបាន។
សេចក្តីថ្លែងការណ៍បានឱ្យដឹងថា សហភាពអឺរ៉ុប អាមេរិក និងអូស្ត្រាលី បានដាក់ទណ្ឌកម្មបន្ថែមក្នុងខែតុលា ដើម្បីទប់ស្កាត់ការប្រើប្រាស់ពលករកូរ៉េខាងជើងនៅក្រៅប្រទេស សកម្មភាពវាយប្រហារតាមប្រព័ន្ធអ៊ីនធឺណិត និងកិច្ចសហប្រតិបត្តិការយោធារវាងកូរ៉េខាងជើង និងរុស្ស៊ី ដែលពួកគេចាត់ទុកថាខុសច្បាប់។
ប្រទេសទាំងនេះក៏បានអំពាវនាវឱ្យសមាជិកអង្គការសហប្រជាជាតិ ជាពិសេសប្រទេសដែលមានអាសនៈអចិន្ត្រៃយ៍ក្នុងក្រុមប្រឹក្សាសន្តិសុខ អនុវត្តទណ្ឌកម្មឱ្យបានតឹងរ៉ឹង ដើម្បីទប់ស្កាត់ការអភិវឌ្ឍអាវុធប្រល័យលោក និងការគេចវេះពីទណ្ឌកម្មអន្តរជាតិរបស់កូរ៉េខាងជើង៕
