មន្ត្រីជាន់ខ្ពស់អ៊ីរ៉ង់ម្នាក់ បាននិយាយកាលពីថ្ងៃពុធទី១៥.០៤.២០២៦ថា សមាជិកនាវិកអ៊ីរ៉ង់ជាង២០០នាក់ មកពីនាវាចម្បាំង២គ្រឿង ដែលត្រូវបានជួយសង្គ្រោះ ដោយប្រទេសស្រីលង្កា ត្រូវបានបញ្ជូន ត្រឡប់មកស្រុកកំណើតរបស់ពួកគេវិញហើយ។
សារព័ត៌មាន(រ៉យទ័រ)។
ប្រទេសស្រីលង្កា បានជួយសង្គ្រោះនាវិកអ៊ីរ៉ង់ចំនួន៣២នាក់ ពីនាវាចម្បាំង IRIS Dena នៅថ្ងៃទី៤ ខែមីនា បន្ទាប់ពីវាត្រូវបានវាយប្រហារ ដោយមីស៊ីល torpedo ពីនាវាមុជទឹកអាមេរិក។
នាវានេះ កំពុងវិលត្រឡប់មកពីសមយុទ្ធកងទ័ពជើងទឹក ដែលរៀបចំដោយប្រទេសឥណ្ឌា ក្នុងអំឡុងពេលសង្គ្រាម រវាងសហរដ្ឋអាមេរិក និងអ៊ីស្រាអែល លើប្រទេសអ៊ីរ៉ង់។
ប្រទេសស្រីលង្កា ក៏បានជួយសង្គ្រោះនាវិកចំនួន ២០៨នាក់ ពីនាវាទីពីរឈ្មោះ IRIS Booshehr នៅថ្ងៃទី៥ ខែមីនា ដែលក៏បានស្នើសុំជំនួយពីកូឡុំបូបន្ទាប់ពីវាជួបបញ្ហាម៉ាស៊ីន។
នាវិកនៃនាវាទាំងពីរ ត្រូវបានហោះហើរចេញនៅម៉ោងប្រហែល១១យប់ នៅលើជើងហោះហើរពិសេសមួយ នៅយប់ថ្ងៃអង្គារ អនុរដ្ឋមន្ត្រីក្រសួងការពារជាតិ Aruna Jayasekera បានប្រាប់រ៉យទ័រ។
បន្ទាប់ពីក្រុមនាវិករបស់ខ្លួន ត្រូវបានដឹកជញ្ជូនចេញពីទីក្រុងកូឡុំបូ នាវា IRIS Booshehr ត្រូវបានអូសទៅកាន់ដែនទឹកនៃឆ្នេរសមុទ្រភាគខាងកើតនៃប្រទេសស្រីលង្កា គឺទីក្រុងទ្រីនកូម៉ាលី ហើយទីបំផុតបានទៅដល់នៅព្រឹកថ្ងៃអង្គារ។
លោក Jayasekera បានបន្ថែមថា មានក្រុមនាវិកអ៊ីរ៉ង់ ប្រហែល៨-១០ នាក់ដែលនៅសល់នៅលើនាវា ដើម្បីជួយប្រតិបត្តិការ។
ប្រទេសស្រីលង្កា បានផ្តល់ទិដ្ឋាការចូលរយៈពេល៣០ ថ្ងៃដល់សមាជិកនាវិក និងបានស្នាក់នៅក្នុងជំរំកងទ័ពជើងទឹក និងអាកាស មុនពេលការរៀបចំសម្រាប់ការវិលត្រឡប់របស់ពួកគេទៅកាន់ប្រទេសអ៊ីរ៉ង់វិញ។
យន្តហោះជួលដែលរៀបចំដោយ អ៊ីរ៉ង់បានយកសាកសពសមាជិកនាវិក៨៤ នាក់ពីនាវា Dena ដែលត្រូវបានសម្លាប់នៅក្នុងការវាយប្រហាររបស់សហរដ្ឋអាមេរិក៕