តម្លៃប្រេងបានកើនឡើង នៅថ្ងៃអាទិត្យទី២៦.០៤.២០២៦ បន្ទាប់ពីមន្ត្រីអ៊ីរ៉ង់ម្នាក់បានព្រមានថា ច្រកសមុទ្រ Hormuz«មិនថាក្នុងកាលៈទេសៈណាក៏ដោយ»នឹងមិនវិលត្រឡប់ទៅសភាពដើមវិញឡើយ។
សារព័ត៌មានCNN។
ប្រេងឆៅ Brent ដែលជាស្តង់ដារអន្តរជាតិ បានកើនឡើងប្រហែល 2.14% ដល់ 107.58 ដុល្លារ។ ប្រេងឆៅអាមេរិក បានកើនឡើង 2.08% ដល់ 96.36 ដុល្លារ។
យោងតាមប្រព័ន្ធផ្សព្វផ្សាយរដ្ឋអ៊ីរ៉ង់ លោក Masoud Pezeshkian ប្រធានាធិបតីអ៊ីរ៉ង់ បានប្រាប់នាយករដ្ឋមន្ត្រីប៉ាគីស្ថាន Shehbaz Sharif ថា សកម្មភាពដែលកំពុងបន្តរបស់សហរដ្ឋអាមេរិក កំពុងធ្វើឱ្យខូចទំនុកចិត្ត និងធ្វើឱ្យស្មុគស្មាញដល់ផ្លូវឆ្ពោះទៅរកការសន្ទនា។
ការចោទប្រកាន់នេះ កើតឡើងមួយសប្តាហ៍បន្ទាប់ពីអ៊ីរ៉ង់ បានចោទប្រកាន់សហរដ្ឋអាមេរិកថា«រំលោភលើទំនុកចិត្ត»ហើយបានបិទច្រកសមុទ្រ Hormuz ម្តងទៀត។
លោក Pezeshkian ក៏បាននិយាយផងដែរថា ទីក្រុងតេអេរ៉ង់ នឹងមិនចូលរួមក្នុង«ការចរចាដោយបង្ខំ»ជាមួយសហរដ្ឋអាមេរិកទេ ហើយការបិទផ្លូវកងទ័ពជើងទឹកអាមេរិកនៅកំពង់ផែអ៊ីរ៉ង់នឹងត្រូវបញ្ចប់មុនពេលឈានដល់កិច្ចព្រមព្រៀង។
ទន្ទឹមនឹងនេះដែរ ប្រធានាធិបតី ដូណាល់ ត្រាំ បានលុបចោលបេសកជនអាមេរិកប្រចាំទីក្រុងអ៊ីស្លាម៉ាបាដ នៅនាទីចុងក្រោយនៅថ្ងៃសៅរ៍ ។
បន្ទាប់ពីអ៊ីរ៉ង់ បានបដិសេធមិនធ្វើកិច្ចចរចាដោយផ្ទាល់។
លោក ត្រាំ បានស្តីបន្ទោសមួយផ្នែកចំពោះការលុបចោលនេះទៅលើ”ការប្រយុទ្ធគ្នាផ្ទៃក្នុង”ក្នុងចំណោមមេដឹកនាំទីក្រុងតេអេរ៉ង់។
កិច្ចចរចាសន្តិភាព បានជាប់គាំងមុនពេលសង្គ្រាមអូសបន្លាយរយៈពេលពីរខែ ដែលធ្វើឲ្យការរំខានដល់ប្រេងកាន់តែអូសបន្លាយ និងជំរុញឲ្យតម្លៃប្រេងកើនឡើងខ្ពស់នៅជុំវិញពិភពលោក។
យោងតាមប្រព័ន្ធផ្សព្វផ្សាយពាក់កណ្តាលផ្លូវការរបស់អ៊ីរ៉ង់កាលពីថ្ងៃអាទិត្យ លោក អាលី នីកហ្សាដ អនុប្រធានសភាអ៊ីរ៉ង់ បានមានប្រសាសន៍ថា “យើងបានដឹងថា ប្រសិនបើយើងដាក់ជើងរបស់យើងលើបំពង់កនៃច្រកសមុទ្រហ័រមូស និងបាបអាល់ម៉ាន់ដាប សេដ្ឋកិច្ចពិភពលោកចំនួន 25% នឹងរងផលប៉ះពាល់៕