(បាត់ដំបង)៖ ក្រោយផ្ទុះការវែកញែកនៅលើបណ្ដាញសង្គម និងឈានដល់ឃាត់ខ្លួននារីលក់(ទុរេន)ថៃម្នាក់.!។
ឥឡូវតំណាងអយ្យការ បានសម្រេចចោទប្រកាន់ស្ដ្រី២នាក់ក្នុងបទល្មើសស្រដៀងគ្នា.!។
*នេះបើយោងតាមសេចក្ដីប្រកាសព័ត៌មានរបស់ អយ្យការអមសាលាដំបូងខេត្តបាត់ដំបង ចុះថ្ងៃទី០៧.០៥.២០២៦។
ជនត្រូវចោទទី១៖ ឈ្មោះ ព្រុំ សុខណយ(ហៅយ៉ាដា)ភេទស្រី អាយុ២៦ឆ្នាំ(គេចខ្លួន)ត្រូវចោទប្រកាន់ពីបទ ផ្តើមគំនិត ក្នុងអំពើលួចនាំចូលទំនិញគេចពន្ធ ប្រព្រឹត្តនៅចំណុចច្រកទ្វារតំបន់អូររំដួល(កាប៊ីន)ស្ថិតនៅក្នុងឃុំអូររំដួល ស្រុកភ្នំព្រឹក ខេត្តបាត់ដំបង បទល្មើសព្រហ្មទណ្ឌមានចែងឱ្យផ្តន្ទាទោសតាមបញ្ញត្តិមាត្រា២៨ នៃក្រមព្រហ្មទណ្ឌ និងមាត្រា៧៥ នៃច្បាប់ស្តីពីគយ។
២៖ ឈ្មោះ ព្រឿន សាក់ឡែន ភេទស្រី អាយុ៣១ឆ្នាំ(ឃាត់ខ្លួន)និងបក្ខពួក ត្រូវចោទពីបទ ការលួចនាំចូលទំនិញគេចពន្ធ ប្រព្រឹត្តនៅចំណុចច្រកទ្វារតំបន់អូររំដួល(កាប៊ីន) ស្ថិតនៅក្នុងឃុំអូររំដួល ស្រុកភ្នំព្រឹក ខេត្តបាត់ដំបង កាលពីថ្ងៃទី១៧.១៩និង២១ ខែមេសា ឆ្នាំ២០២៦ បទល្មើសព្រហ្មទណ្ឌមានចែងឱ្យផ្តន្ទា ទោសតាមបញ្ញត្តិមាត្រា ៧៥ នៃច្បាប់ស្តីពីគយ។
ក្រោយធ្វើការចោទប្រកាន់ តំណាងអយ្យការ បានបញ្ជូនសំណុំរឿង ទៅចៅក្រមស៊ើបសួរ ដើម្បីចាត់ការបន្តតាមច្បាប់។
គួរំលឹកថាថ្មីៗនេះ មហាជនបានផ្ទុះការរិៈគន់និងវែកញែក នៅលើបណ្ដាញសង្គម ពាក់ព័ន្ធការលួចនាំចូល(ទុរេន)ថៃ រួចបន្លំថា(ទុរេន)ខ្មែរដើម្បីលក់នៅលើទីផ្សារ.ក្នុងខេត្តបាត់ដំបង។
ទន្ទឹមនិងនោះ មន្ត្រីជំនាញខេត្ត ក៏បានចុះពិនិត្យដល់ក្នុងផ្សារ ដោយអះអាងថា(ទុរេន)ខ្មែរ ។
ប៉ុន្តែជនត្រូវចោទឈ្មោះ ព្រឿន សាក់ឡែន បែរជាសារភាពតាមត្រង់ថា ខ្លួននាំចូលនិងលក់(ទុរេន)ថៃ។
បន្ទាប់មកសមត្ថកិច្ច ក៏បានស្រាវជ្រាវរកអ្នកពាក់ព័ន្ធ និងឈានដល់ឃាត់ខ្លួនឈ្មោះ ព្រឿន សាក់ឡែន បញ្ជូនទៅកាន់តុលាការ។
ពោលគឺ រហូតមកទល់ពេលនេះមហាជនកំពុងទន្ទឹងរង់ចាំមើល ថាតើសមត្ថកិច្ច នឹងឃាត់ខ្លួន មន្ត្រីពាក់ព័ន្ធបញ្ជូនទៅតុលាការ ដូចអាជីវករដែរឬទេ៕
