យោងតាមរបាយការណ៍ ដែលចេញផ្សាយដោយអាជ្ញាធរសុខាភិបាលបានឱ្យដឹងថា មានករណីឆ្លងជំងឺវីរុសអេបូឡា លើសពី100ករណីហើយ។
ខណៈការឆ្លងកើនឡើងនៅក្នុងសាធារណរដ្ឋប្រជាធិបតេយ្យកុងហ្គោ។
សារព័ត៌មានTRT នៅថ្ងៃទី២៥.០៥.២០២៦។
របាយការណ៍ដែលចេញ ដោយក្រសួងទំនាក់ទំនងបានបង្ហាញថា គិតត្រឹមថ្ងៃទី 23 ខែឧសភា វីរុសនេះបានប៉ះពាល់ដល់តំបន់សុខភាពចំនួន 11នៅក្នុងប្រទេសកុងហ្គោ ចាប់តាំងពីការផ្ទុះឡើងនៅថ្ងៃទី15 ខែឧសភា នៅក្នុងខេត្ត Ituri ដោយមានករណីសង្ស័យជាង 900ករណីត្រូវបានកត់ត្រាទុក។
ការរាតត្បាតអេបូឡា នៅតែសកម្មនៅក្នុងខេត្តចំនួនបី រួមមាន Ituri, North Kivu និង South Kivu។
“អាជ្ញាធរសុខាភិបាល បន្តតាមដាន ត្រួតពិនិត្យ និងសកម្មភាពយល់ដឹងនៅក្នុងតំបន់ដែលរងផលប៉ះពាល់។ ការប្រុងប្រយ័ត្ន និងការប្រកាន់ខ្ជាប់នូវវិធានការបង្ការនៅតែចាំបាច់”។
យោងតាមអង្គការសុខភាពពិភពលោក យ៉ាងហោចណាស់ មានអ្នកស្លាប់ចំនួនប្រាំពីរនាក់ត្រូវបានបញ្ជាក់នៅក្នុងប្រទេសកុងហ្គោ។
ក្រសួងសុខាភិបាល បាននិយាយថា ករណីថ្មីចំនួនបី ត្រូវបានប្រកាសនៅក្នុងប្រទេសអ៊ូហ្គង់ដាកាលពីថ្ងៃសៅរ៍ ដែលធ្វើឱ្យចំនួនករណីដែលបានបញ្ជាក់សរុបចាប់តាំងពីការផ្ទុះឡើងបច្ចុប្បន្នឡើងដល់ប្រាំករណី។
អាជ្ញាធរកុងហ្គោ បានផ្អាកសកម្មភាពសង្គមនៅអ៊ីទូរី ដែលជាចំណុចកណ្តាលនៃការផ្ទុះឡើងនៃជំងឺនេះ រួមទាំងកីឡាផងដែរ ដើម្បីទប់ស្កាត់ការរីករាលដាលនៃជំងឺអេបូឡា។
យោងតាមមជ្ឈមណ្ឌលគ្រប់គ្រង និងបង្ការជំងឺអាហ្វ្រិក (Africa CDC) ប្រទេសចំនួនដប់ រួមមានប្រទេសរវ៉ាន់ដា កេនយ៉ា តង់ហ្សានី អង់ហ្គោឡា ប៊ូរុនឌី សាធារណរដ្ឋអាហ្វ្រិកកណ្តាល សាធារណរដ្ឋកុងហ្គោ អេត្យូពី ស៊ូដង់ខាងត្បូង និងហ្សំប៊ី ប្រឈមមុខនឹងហានិភ័យនៃការផ្ទុះឡើងនៃជំងឺអេបូឡា។
អង្គការសុខភាពពិភពលោកបានដំឡើងកម្រិតប្រកាសអាសន្នដល់”កម្រិតខ្ពស់ខ្លាំង”ហើយប្រទេសជាច្រើនដែលនៅជិតខាងកុងហ្គោបានបង្កើនវិធានការបង្ការដើម្បីការពារការរីករាលដាលនៃមេរោគនេះ រួមទាំងការរឹតបន្តឹងការធ្វើដំណើរពីកុងហ្គោ៕
