សហរដ្ឋអាមេរិកនិងអ៊ីរ៉ង់ ជិតចុះហត្ថលេខាលើកិច្ចព្រមព្រៀងមួយដែលពាក់ព័ន្ធ នឹងការបន្តបទឈប់បាញ់រយៈពេល60 ថ្ងៃ ក្នុងអំឡុងពេលនោះច្រកសមុទ្រ Hormuz នឹងត្រូវបានបើកឡើងវិញ ។
អ៊ីរ៉ង់ នឹងអាចលក់ប្រេងដោយសេរី ហើយការចរចា នឹងត្រូវបានធ្វើឡើងលើការទប់ស្កាត់កម្មវិធីនុយក្លេអ៊ែររបស់អ៊ីរ៉ង់ នេះបើយោងតាមរបាយការណ៍របស់ Axios កាលពីថ្ងៃសៅរ៍ទី២៣.០៥.២០២៦ ដោយដកស្រង់សម្តីមន្ត្រីអាមេរិកម្នាក់។
សារព័ត៌មាន(រ៉យទ័រ)។
យោងតាមរបាយការណ៍របស់ Axios ក្នុងអំឡុងពេល 60ថ្ងៃ ច្រកសមុទ្រ Hormuz នឹងបើកចំហដោយគ្មានការបង់ប្រាក់ ហើយអ៊ីរ៉ង់នឹងយល់ព្រមសម្អាតមីនដែលខ្លួន បានដាក់ពង្រាយនៅក្នុងច្រកសមុទ្រ ដើម្បីអនុញ្ញាតឱ្យកប៉ាល់ឆ្លងកាត់ដោយសេរី។
ជាផ្នែកមួយនៃកិច្ចព្រមព្រៀង ដែលបានស្នើឡើង សហរដ្ឋអាមេរិក នឹងលើកការបិទផ្លូវរបស់ខ្លួនលើកំពង់ផែអ៊ីរ៉ង់ និងចេញការលើកលែងទណ្ឌកម្ម មួយចំនួន ដើម្បីអនុញ្ញាតឱ្យអ៊ីរ៉ង់ លក់ប្រេងដោយសេរី នេះបើយោងតាមរបាយការណ៍ដែលបានបន្ថែម។
សេចក្តីព្រាងកិច្ចព្រមព្រៀងនេះ ក៏រួមបញ្ចូលទាំងការប្តេជ្ញាចិត្តពីអ៊ីរ៉ង់ថា នឹងមិនដែលបន្តអាវុធនុយក្លេអ៊ែរ និងចរចាលើការផ្អាកកម្មវិធីចម្រាញ់អ៊ុយរ៉ាញ៉ូមរបស់ខ្លួន និងការដកយកស្តុកអ៊ុយរ៉ាញ៉ូមដែលចម្រាញ់ខ្ពស់របស់ខ្លួនចេញ នេះបើយោងតាមរបាយការណ៍របស់ Axios។
ប្រភពពីរបានប្រាប់ Axios ថា អ៊ីរ៉ង់បានផ្តល់ឱ្យសហរដ្ឋអាមេរិក តាមរយៈអ្នកសម្របសម្រួលនូវការប្តេជ្ញាចិត្តដោយពាក្យសំដីអំពីវិសាលភាពនៃសម្បទានដែលខ្លួនសុខចិត្តធ្វើលើការផ្អាកការចម្រាញ់ និងការបោះបង់ចោលសម្ភារៈនុយក្លេអ៊ែរ។
របាយការណ៍របស់ Axios បាននិយាយថា សហរដ្ឋអាមេរិក ក៏នឹងយល់ព្រមចរចាលើការលើកទណ្ឌកម្ម និងការបញ្ឈប់ការបង្កកមូលនិធិអ៊ីរ៉ង់ក្នុងរយៈពេល 60ថ្ងៃ៕
