ទួរគី បានថ្កោលទោសយ៉ាងខ្លាំង ចំពោះការវាយប្រហារភេរវកម្ម ដែលកំណត់គោលដៅលើរថភ្លើងដឹកអ្នកដំណើរ នៅខេត្ត Balochistan ប្រទេសប៉ាគីស្ថាន បណ្ដាលឱ្យស្លាប់២៨នាក់ និងរបួស៩០នាក់។
សារព័ត៌មានTRT នៅថ្ងៃទី២៤.០៥.២០២៦។
នៅក្នុងសេចក្តីថ្លែងការណ៍ជាលាយលក្ខណ៍អក្សរ កាលពីថ្ងៃអាទិត្យ ក្រសួងការបរទេសតួកគី បាននិយាយថា ខ្លួនមានការសោកស្ដាយយ៉ាងខ្លាំងចំពោះអ្នកស្លាប់ និងរបួសដែលបង្កឡើង ដោយការវាយប្រហារនៅព្រឹកព្រលឹមនេះ។
សេចក្តីថ្លែងការណ៍នេះ បាននិយាយថា “យើងថ្កោលទោសយ៉ាងខ្លាំងចំពោះការវាយប្រហារដ៏សាហាវយង់ឃ្នងនេះ សូមព្រះមេត្តាករុណា ចំពោះអ្នកដែលបានបាត់បង់ជីវិត និងសូមចូលរួមរំលែកទុក្ខជាមួយក្រុមគ្រួសាររបស់ពួកគេ និងប្រជាជនប៉ាគីស្ថាន”។
ក្រសួងបានសង្កត់ធ្ងន់ថា ការវាយប្រហារបែបនេះមដែលកំណត់គោលដៅលើសន្តិភាព និងស្ថិរភាពនៃតំបន់គឺមិនអាចទទួលយកបានក្រោមកាលៈទេសៈណាក៏ដោយ និងបានបញ្ជាក់ជាថ្មីនូវសាមគ្គីភាពរវាងតួកគី និងប៉ាគីស្ថានក្នុងការប្រយុទ្ធប្រឆាំងនឹងអំពើភេរវកម្ម។
មនុស្សប្រហែល 28នាក់ត្រូវបានសម្លាប់ និង 90នាក់ផ្សេងទៀតរងរបួសនៅក្នុងការផ្ទុះនៅលើផ្លូវរថភ្លើងមួយក្នុងខេត្ត Balochistan កាលពីថ្ងៃអាទិត្យ។
ប៉ូលីសបាននិយាយថា ការផ្ទុះនេះបានកើតឡើង ខណៈពេលដែលរថភ្លើងកំពុងធ្វើដំណើរឆ្ពោះទៅកាន់តំបន់បន្ទាយរបស់ទីក្រុង។
ខេត្តបាឡូជីស្ថាន ដែលជាតំបន់សម្បូរទៅដោយរ៉ែ និងជាផ្លូវសំខាន់មួយសម្រាប់ច្រករបៀងសេដ្ឋកិច្ចចិន-ប៉ាគីស្ថានដែលមានតម្លៃរាប់ពាន់លានដុល្លារ បានប្រឈមមុខនឹងអំពើភេរវកម្មជាយូរមកហើយ៕
