ប្រធានាធិបតីអាមេរិកលោក Donald Trump កាលពីថ្ងៃចន្ទទី១៥.០៦.២០២៦ បានបដិសេធការអះអាងដែលថា ទីក្រុងវ៉ាស៊ីនតោន នឹងផ្តល់សំណងចំនួន៣០០ពាន់លានដុល្លារដល់អ៊ីរ៉ង់ ដោយថានេះជា”ព័ត៌មានក្លែងក្លាយ”។
សារព័ត៌មានAnadolu។
លោក Trump អះអាងនៅលើវេទិកាប្រព័ន្ធផ្សព្វផ្សាយសង្គមថា “រឿងរ៉ាវដែលថា សហរដ្ឋអាមេរិក កំពុងបង់ប្រាក់ចំនួន300 លានដុល្លារដល់អ៊ីរ៉ង់ គឺជាព័ត៌មានក្លែងក្លាយ”។
ខណៈពេល ដែលលោកបានលើកឡើងពីតួលេខ “300លានដុល្លារ” វានៅតែមិនច្បាស់លាស់ថា តើលោកកំពុងផ្ទុយនឹងចំនួនទឹកប្រាក់”300ពាន់លានដុល្លារ” ដ៏ធំជាងនេះដែលបានលើកឡើងដោយមន្ត្រីរដ្ឋបាលផ្សេងទៀត និងប្រព័ន្ធផ្សព្វផ្សាយអន្តរជាតិដែរឬទេ។
អនុប្រធានាធិបតីអាមេរិក លោក JD Vance បានបញ្ជាក់ថា មូលនិធិណាមួយដែលបានស្នើឡើងចំនួន300 ពាន់លានដុល្លារ នឹងមានប្រភពមកពីសម្ព័ន្ធមិត្តក្នុងតំបន់ ជាជាងអ្នកជាប់ពន្ធអាមេរិក។
លោក Vance បានប្រាប់ NBC News ថា “គ្មានប្រាក់មួយកាក់មួយសេនណាមក ពីសហរដ្ឋអាមេរិកទេ”។
លោកបានពន្យល់ថា ប្រទេសអារ៉ាប់ឈូងសមុទ្រអាចជ្រើសរើស វិនិយោគ លុះត្រាតែទីក្រុងតេអេរ៉ង់ ធ្វើឱ្យសេដ្ឋកិច្ចរបស់ខ្លួន”អាចវិនិយោគបាន”ហើយចាប់ផ្តើមមានឥរិយាបទដូចជា “ប្រទេសធម្មតា”។
មន្ត្រីជាន់ខ្ពស់អាមេរិកម្នាក់ បានបញ្ជាក់មុននេះថា ខណៈពេលដែលមូលនិធិរាប់ពាន់លានដុល្លារគឺជាផ្នែកមួយនៃការពិភាក្សាការទូត វឌ្ឍនភាពហិរញ្ញវត្ថុទាំងអស់គឺ«ជាប់ទាក់ទងនឹងការអនុវត្ត»យ៉ាងតឹងរ៉ឹង។
កាសែត Financial Times បានបង្ហាញថា ការបង្កើតមូលនិធិនេះគឺអាស្រ័យលើការដោះស្រាយចុងក្រោយ ដែលរួមមានការបន្តបទឈប់បាញ់រយៈពេល 60ថ្ងៃ និងការបើកច្រកសមុទ្រ Hormuz ឡើងវិញទាំងស្រុង។
វាបានកត់សម្គាល់បន្ថែមទៀតថា ដើមទុននេះទំនងជាត្រូវបានគ្រប់គ្រងតាមរយៈក្របខ័ណ្ឌសម្រាប់ក្រុមហ៊ុនឯកជនដែលចាប់អារម្មណ៍លើទីផ្សារអ៊ីរ៉ង់ ជាជាងជំនួយផ្ទាល់ពីរដ្ឋាភិបាលទៅរដ្ឋាភិបាល៕
