(ភ្នំពេញ)៖ លោក ហេង រតនា ស្នងការរងរាជធានីភ្នំពេញ បានប្រកាសថា ផែននគរបាលចរាចរណ៍ បានពឹងពាក់មេធាវីប្រចាំផែន ដើម្បីប្តឹងជនបង្កឈ្មោះ ទ្រី សក្ដិដា ករណីបើកបរក្រោមឥទ្ធិពលនៃសារធាតុញៀន បណ្តាលឱ្យកុមារីម្នាក់ស្លាប់បាត់បង់ជីវិត និងស្ត្រីជាម្តាយរងរបួសធ្ងន់ធ្ងរ។
ហេតុការណ៍នេះ បានកើតឡើងកាលពីរសៀលថ្ងៃទី០៧ ខែសីហា ឆ្នាំ២០២៦ នៅផ្លូវ៥៩៨ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ករណីគ្រោះថ្នាក់ចរាចរណ៍ខាងលើ បានបង្កការចាប់អារម្មណ៍ និងការសោកស្តាយយ៉ាងខ្លាំង ក្នុងចំណោមមហាជន ជាពិសេស ដោយសារមានអ្នកស្លាប់ និងអ្នករងរបួសធ្ងន់។
លោក ហេង រតនា បានសរសេររៀបរាប់យ៉ាងដូច្នេះថា«ពេលនេះផែននគរបាលចរាចរណ៍ នៃស្នងការដ្ឋាននគរបាលរាជធានីភ្នំពេញ បានពឹងពាក់មេធាវីប្រចាំផែនចរាចរណ៍ ប្តឹងលោកទ្រីសក្កដា ដែលបានបើកបរដោយមានសារធាតុញៀនធ្វើអោយម្តាយរបួសធ្ងន់ធ្ងរខ្លាំងនឹងកូនស្រីស្លាប់ដែលគួរអោយអាណិតបំផុតនោះជាផ្លូវការដោយមិនអោយរួចខ្លួនបានឡើយ»។
សកម្មភាពនេះបានបង្ហាញពីជំហរយ៉ាងម៉ឺងម៉ាត់របស់កងកម្លាំងសមត្ថកិច្ច នៅក្នុងការអនុវត្តច្បាប់ចរាចរណ៍ផ្លូវគោក និងការទប់ស្កាត់បទល្មើសគ្រឿងញៀន ដើម្បីស្វែងរកយុត្តិធម៌ជូនជនរងគ្រោះ និងក្រុមគ្រួសារ៕
