(ភ្នំពេញ)៖ នាព្រឹកថ្ងៃទី១០ ខែសីហា ឆ្នាំ២០២៦ ដំណើរការសំណេរនៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០២៦ បានចាប់ផ្តើមជាផ្លូវការហើយ។ ក្នុងនោះលោក ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈនិង លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញចូលរួមបើកហឹបវិញ្ញាសាជានិមិត្តរូប នៅមណ្ឌលប្រឡងវិទ្យាល័យព្រះស៊ីសុវត្ថិ រាជធានីភ្នំពេញ។
ការបើកហឹបវិញ្ញាសានេះត្រូវបានធ្វើឡើងដោយមានការចូលរួមសង្កេតការណ៍ផ្ទាល់ពីតំណាងអង្គភាពប្រឆាំងអំពើពុករលួយ (អ.ប.ព.) សហភាពសព័ន្ធយុវជនកម្ពុជា (ស.ស.យ.ក.) គណៈមេប្រយោគ អនុរក្ស និងតំណាងបេក្ខជន ដើម្បីធានាថា ហឹបវិញ្ញាសាទាំងអស់មានការបិទត្រឹមត្រូវនិងត្រាស្រោបប្រធានវិញ្ញាសា ដោយមិនមានការលេចធ្លាយ និងប្រកបដោយតម្លាភាពខ្ពស់ មុននឹងចែកជូនបេក្ខជនតាមបន្ទប់ប្រឡងនីមួយៗ។
ឱកាសដ៏សំខាន់នេះផងដែរ សូមជូនពរដល់ក្មួយៗ សិស្សានុសិស្សទូទាំងប្រទេស មានទំនុកចិត្តលើសមត្ថភាពដែលបានខិតខំរៀនសូត្រអស់រយៈពេល ១២ឆ្នាំកន្លងមកនេះ (អ្នកចេះ គឺជាប់)និងសូមឱ្យការតស៊ូ និងការលះបង់របស់ក្មួយៗព្រមទាំងការទន្ទឹងរង់ចាំរបស់ លោកឪពុកអ្នកម្តាយអាណាព្យាបាល ទទួលបានផ្លែផ្កាជាជ័យជម្នះនិងទទួលបាននិទ្ទេសដែលខ្លួនប្រាថ្នា។ សូមក្មួយៗទាំងអស់ទទួលបានជោគជ័យ និងលទ្ធផលល្អប្រសើរគ្រប់ៗគ្នា។
គួរបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៦ មានបេក្ខជនចុះឈ្មោះប្រឡងសរុបចំនួន ១៥១,២៣៨ នាក់ (ស្រី ៨៤,៧៣៥ នាក់) និងត្រូវបានបែងចែកជា(២៤៤)មណ្ឌលសំណេរនៅទូទាំងប្រទេស៕
