យ៉ាងហោចណាស់មនុស្ស៥២នាក់បានស្លាប់ បន្ទាប់ពីទូកមួយគ្រឿងដែលដឹកកសិករ និងកម្មករទៅធ្វើការនៅចម្ការស្រូវ បានក្រឡាប់នៅរដ្ឋ Sokoto ភាគពាយ័ព្យប្រទេសនីហ្សេរីយ៉ា កាលពីថ្ងៃព្រហស្បតិ៍ ទី២០ ខែសីហា ឆ្នាំ២០២៦។
ប្រភពពីសារព័ត៌មានAnadolu Agency។
យោងតាមទីភ្នាក់ងារគ្រប់គ្រងគ្រោះមហន្តរាយជាតិ (NEMA) ប្រចាំរដ្ឋ Sokoto ទូកបានក្រឡាប់ ខណៈកំពុងឆ្លងកាត់ផ្លូវទឹកមួយក្បែរទីក្រុង Gorau ក្នុងតំបន់រដ្ឋបាលមូលដ្ឋាន Goronyo។
លោក Tukur Abubakar ប្រធានប្រតិបត្តិការរបស់ NEMA ប្រចាំរដ្ឋ Sokoto បានបញ្ជាក់កាលពីព្រឹកថ្ងៃសុក្រ ទី២១ ខែសីហា ថា ចំនួនអ្នកស្លាប់បានកើនឡើងដល់ ៥២នាក់។ អាជ្ញាធរកំពុងបន្តស្វែងរក និងប្រមូលសាកសព ព្រមទាំងសហការជាមួយអាជ្ញាធរមូលដ្ឋាន ដើម្បីកំណត់អត្តសញ្ញាណជនរងគ្រោះ និងជូនដំណឹងដល់ក្រុមគ្រួសារ។
មន្ត្រីអាជ្ញាធរផ្លូវទឹកក្នុងស្រុកបានឱ្យដឹងថា សាកសពជាច្រើននាក់ រួមទាំងកុមារ ត្រូវបានរកឃើញ។ ប្រជាពលរដ្ឋក្នុងតំបន់បាននិយាយថា ទូកនេះអាចមានមនុស្ស ជាង ៧០នាក់ នៅពេលក្រឡាប់។
គ្រោះថ្នាក់នេះបានបន្ថែមទៅលើករណីគ្រោះថ្នាក់តាមផ្លូវទឹកជាច្រើននៅនីហ្សេរីយ៉ា ដែលតែងតែត្រូវបានគេចាត់ទុកថា ការដឹកមនុស្សលើសចំណុះ កង្វះវិធានការសុវត្ថិភាព និងការអនុវត្តបទប្បញ្ញត្តិមិនបានតឹងរ៉ឹង គឺជាកត្តាសំខាន់ដែលបង្កឱ្យមានគ្រោះថ្នាក់៕
