កាលពីល្ងាចថ្ងៃព្រហស្បតិ៍ទី២០ខែសីហា ជនជាតិប៉ាឡេស្ទីន ៣នាក់បានរងរបួស បន្ទាប់ពីអ្នកតាំងទីលំនៅអ៊ីស្រាអែលបានវាយប្រហារលើផ្ទះប្រជាពលរដ្ឋនៅតំបន់ Khirbet Deir Shams ភាគខាងត្បូងទីក្រុង Hebron ក្នុងតំបន់វេស្ទ៍បែងដែលកាន់កាប់។
ប្រភពពីសារព័ត៌មានAnadolu Agency។
តាម Palestine TV ដោយដកស្រង់សមាគមអឌ្ឍចន្ទក្រហមប៉ាឡេស្ទីន អ្នករងរបួសទាំង៣នាក់ត្រូវបានរាយការណ៍ថារងរបួសក្នុងការវាយប្រហារ ប៉ុន្តែមិនទាន់មានព័ត៌មានលម្អិតអំពីស្ថានភាពរបស់ពួកគេឡើយ។
សាក្សីបានឱ្យដឹងថា អ្នកតាំងទីលំនៅមួយក្រុម ដែលអមដំណើរដោយកងទ័ពអ៊ីស្រាអែល បានចូលតំបន់ជិតក្រុង Al-Dhahiriya និងចូលទៅក្នុងទ្រុងចៀមរបស់ប្រជាពលរដ្ឋប៉ាឡេស្ទីន ដោយរឹបអូសសត្វចិញ្ចឹមមួយចំនួន។
នៅភាគខាងជើងវេស្ទ៍បែង ក៏មានសេចក្តីរាយការណ៍ថា អ្នកតាំងទីលំនៅបានគប់ដុំថ្មទៅលើយានយន្តប៉ាឡេស្ទីននៅភាគខាងត្បូង Tulkarem បង្កការភ័យខ្លាចដល់អ្នកបើកបរ និងអ្នកដំណើរ ប៉ុន្តែមិនមានអ្នករងរបួសត្រូវបានរាយការណ៍ទេ។ នៅភូមិ Al-Nazla Al-Sharqiya អ្នកតាំងទីលំនៅក៏បានចូលតាមដងផ្លូវនានា ដែលធ្វើឱ្យភាពតានតឹងក្នុងតំបន់កើនឡើង។
ការវាយប្រហាររបស់អ្នកតាំងទីលំនៅ និងប្រតិបត្តិការយោធាអ៊ីស្រាអែលនៅវេស្ទ៍បែងបានកើនឡើងជាបន្តបន្ទាប់ ខណៈការតាំងទីលំនៅ និងការរឹតត្បិតលើការធ្វើដំណើររបស់ប្រជាជនប៉ាឡេស្ទីនក៏បន្តពង្រីក៕
