ប្រេស៊ីលកំពុងក្លាយជាគោលដៅសំខាន់ក្នុងការស្វែងរករ៉ែ Rare Earth ដែលមានសារៈសំខាន់សម្រាប់ផលិតទូរស័ព្ទ បច្ចេកវិទ្យាទំនើប និងថាមពលកកើតឡើងវិញ ខណៈសហរដ្ឋអាមេរិក អូស្ត្រាលី និងប្រទេសផ្សេងៗកំពុងព្យាយាមកាត់បន្ថយការពឹងផ្អែកលើចិន។
ប្រភពពីសារព័ត៌មានAP នៅថ្ងៃទី២១ ខែសីហា ឆ្នាំ២០២៦។
តាមការវិភាគរបស់ Associated Press និង Reporter Brasil ប្រេស៊ីលមានស្តុករ៉ែ Rare Earth ធំជាងគេលំដាប់ទី២ លើពិភពលោក បន្ទាប់ពីចិន។ ការកើនឡើងនៃតម្រូវការបានទាក់ទាញការវិនិយោគពីបរទេសយ៉ាងខ្លាំង ដោយប្រហែល ៤២% នៃពាក្យស្នើសុំស្វែងរករ៉ែចំនួន ២,៧២៧ ត្រូវបានដាក់ដោយក្រុមហ៊ុនបុត្រសម្ព័ន្ធបរទេស ឬក្រុមហ៊ុនដែលមានទុនបរទេស។
ក្នុងចំណោមក្រុមហ៊ុនចំនួន ២០ ដែលដាក់ពាក្យស្នើសុំច្រើនជាងគេ មាន១១ក្រុមហ៊ុនទទួលបានការគាំទ្រពីទុនបរទេស ជាពិសេសពីអូស្ត្រាលី សហរដ្ឋអាមេរិក និងកាណាដា។ ទិន្នន័យរបស់ទីភ្នាក់ងារជាតិរ៉ែប្រេស៊ីលបង្ហាញថា ជាង ៨៦% នៃពាក្យស្នើសុំ ត្រូវបានដាក់ក្នុងរយៈពេល ៣ ឆ្នាំចុងក្រោយ រួមទាំង ២៦៨ ពាក្យក្នុងឆមាសទី១ ឆ្នាំ២០២៦។
ទោះជាយ៉ាងណា ការពង្រីកការរុករករ៉ែក៏បង្កការព្រួយបារម្ភយ៉ាងខ្លាំងអំពីបរិស្ថាន ជាពិសេសនៅតំបន់ក្បែរព្រៃអាម៉ាហ្សូន។ សហគមន៍ជនជាតិដើមភាគតិចក៏កំពុងបង្ហាញការព្រួយបារម្ភចំពោះផលប៉ះពាល់ដែលអាចកើតមានលើដីធ្លី ធនធានធម្មជាតិ និងជីវភាពរស់នៅ៕
