យ៉ាងហោចណាស់មនុស្ស៦នាក់បានស្លាប់និងជាង១,០០០នាក់បានភៀសខ្លួន បន្ទាប់ពីកងកម្លាំងប៉ារ៉ាមីលីតារ Rapid Support Forces (RSF) វាយប្រហារលើភូមិពីរនៅភាគនិរតីនៃទីក្រុង El Obeid រដ្ឋNorth Kordofanរបស់ប្រទេសស៊ូដង់។
ប្រភពពីសារព័ត៌មានAnadolu Agency នៅថ្ងៃទី២១ខែសីហា។
តាមសារព័ត៌មាន Sudan Tribune ការវាយប្រហារបានកើតឡើងកាលពីថ្ងៃពុធ នៅភូមិ Umm Dreisa និង Al-Shaqla ដែលស្ថិតនៅចម្ងាយប្រហែល ៤០ គីឡូម៉ែត្រពី El Obeid។ មនុស្សជាច្រើននាក់ទៀតត្រូវបានរាយការណ៍ថារងរបួស ឬបាត់ខ្លួន។
មន្ត្រីរដ្ឋ North Kordofan បាននិយាយថា ប្រជាជនជាង ១,០០០ នាក់មកពី ២១៥ គ្រួសារ រួមមានស្ត្រី កុមារ និងមនុស្សចាស់ បានដើររាប់សិបគីឡូម៉ែត្រដើម្បីភៀសខ្លួនទៅកាន់ទីក្រុង El Obeid។ មួយចំនួនត្រូវបានបញ្ជូនទៅជំរំជនភៀសខ្លួន។
ស៊ូដង់បានធ្លាក់ក្នុងសង្គ្រាមចាប់តាំងពីខែមេសា ឆ្នាំ២០២៣ រវាង RSF និងកងទ័ពរដ្ឋាភិបាល។ ជម្លោះនេះបានបណ្តាលឱ្យមនុស្សរាប់ពាន់នាក់ស្លាប់ និងប្រហែល ១៣ លាននាក់ត្រូវបានបង្ខំឱ្យភៀសខ្លួន ខណៈវិបត្តិអាហារ និងមនុស្សធម៌កាន់តែធ្ងន់ធ្ងរនៅទូទាំងប្រទេស៕
