មន្ត្រីសន្តិសុខអ៊ីស្រាអែលបានព្រមានថា ការវាយប្រហាររបស់អ្នកតាំងលំនៅអ៊ីស្រាអែលលើប្រជាជនប៉ាឡេស្ទីននៅតំបន់ West Bank កំពុងបង្កការខូចខាតផ្នែកនយោបាយយ៉ាងធ្ងន់ធ្ងរដល់អ៊ីស្រាអែល និងធ្វើឱ្យកងទ័ពអ៊ីស្រាអែលដែលឈរជើងនៅតំបន់នោះរងសម្ពាធកាន់តែខ្លាំង។
ប្រភពពីសារព័ត៌មានAnadolu Agency នៅថ្ងៃទី២២ខែសីហា។
តាមការរាយការណ៍ មន្ត្រីទាំងនោះបាននិយាយថា ប៉ូលិស និងអាជ្ញាធររដ្ឋមិនបានចាត់វិធានការរឹងមាំគ្រប់គ្រាន់ ដើម្បីទប់ស្កាត់ការវាយប្រហារទាំងនេះទេ។ ដូច្នេះ កងទ័ពត្រូវចូលមកដោះស្រាយហេតុការណ៍ជាច្រើននៅលើដី ដែលធ្វើឱ្យបន្ទុករបស់កងទ័ពកាន់តែធ្ងន់។
ការព្រមាននេះកើតឡើងបន្ទាប់ពីហេតុការណ៍មួយនៅទីក្រុង Sa’ir ក្នុងខេត្ត Hebron កាលពីថ្ងៃសុក្រ ដែលបណ្តាលឱ្យយុវជនប៉ាឡេស្ទីនអាយុ ១៧ ឆ្នាំម្នាក់ឈ្មោះ Karim Shalaldeh ស្លាប់ដោយសារគ្រាប់កាំភ្លើង និងមានអ្នកផ្សេងទៀតរងរបួស។
សូមបញ្ជាក់ថា៖ តំបន់ West Bank បានឃើញការកើនឡើងនៃប្រតិបត្តិការរបស់កងទ័ពអ៊ីស្រាអែល និងការវាយប្រហាររបស់អ្នកតាំងលំនៅលើប្រជាជន និងទ្រព្យសម្បត្តិប៉ាឡេស្ទីន ចាប់តាំងពីសង្គ្រាមនៅ Gaza ចាប់ផ្តើមក្នុងខែតុលា ឆ្នាំ ២០២៣៕
