អាជ្ញាធរយេម៉ែនបានឱ្យដឹងថា កងទ័ពជើងទឹកបានរកឃើញមីនសមុទ្រមួយ ដែលត្រូវបានចោទថា ដាក់ដោយក្រុមហ៊ូទី នៅតំបន់សំខាន់មួយនៃច្រកសមុទ្រ Bab al-Mandab កាលពីថ្ងៃទី២២ ខែសីហា ឆ្នាំ២០២៦។
ប្រភពពីសារព័ត៌មានAnadolu Agency។
តាមទីភ្នាក់ងារព័ត៌មានរដ្ឋ Saba មីននេះត្រូវបានរកឃើញនៅជិតផ្លូវដែលនាវាអន្តរជាតិធ្វើដំណើរ។ កងកម្លាំងជើងទឹកបានបិទបាំង និងដោះស្រាយមីននោះ ដើម្បីការពារកុំឱ្យបង្កគ្រោះថ្នាក់ដល់នាវាដឹកទំនិញ និងនាវាផ្សេងៗដែលឆ្លងកាត់តំបន់នេះ។
អាជ្ញាធរយេម៉ែនបានចាត់ទុកការរកឃើញមីននេះថា ជាការគំរាមកំហែងធ្ងន់ធ្ងរដល់សុវត្ថិភាពនៃការធ្វើនាវាចរណ៍ ព្រោះ Bab al-Mandab គឺជាច្រកសមុទ្រសំខាន់មួយសម្រាប់ពាណិជ្ជកម្ម និងការដឹកជញ្ជូនតាមសមុទ្រអន្តរជាតិ។
ក្រុមហ៊ូទីមិនទាន់ចេញមុខបកស្រាយចំពោះការចោទប្រកាន់នេះនៅឡើយទេ។ ប្រទេសយេម៉ែនបានជាប់ក្នុងសង្គ្រាមតាំងពីឆ្នាំ២០១៤ បន្ទាប់ពីក្រុមហ៊ូទីកាន់កាប់រដ្ឋធានី Sanaa និងតំបន់មួយចំនួនរបស់ប្រទេស៕
