ប្រធានាធិបតីបារាំង លោកEmmanuel Macron បាននិយាយកាលពីថ្ងៃទី២២ ខែសីហា ឆ្នាំ២០២៦ ថារុស្ស៊ីកំពុងព្យាយាមបំបាក់អ៊ុយក្រែនតាមរយៈការបង្កភ័យខ្លាច បន្ទាប់ពីការវាយប្រហាររបស់រុស្ស៊ីលើមជ្ឈមណ្ឌលពាណិជ្ជកម្មមួយនៅទីក្រុង Kryvyi Rih ដែលបណ្តាលឱ្យមានជនស៊ីវិលរងគ្រោះច្រើន។
ប្រភពពីសារព័ត៌មានAnadolu Agency។
លោក Macron បាននិយាយថា បារាំងនឹងបង្កើនការគាំទ្រដល់អ៊ុយក្រែន ដោយផ្តល់ប្រព័ន្ធ និងមីស៊ីលសម្រាប់ការការពារពីការវាយប្រហារតាមអាកាស ព្រមទាំងបន្តកិច្ចសហប្រតិបត្តិការជាមួយក្រុមប្រទេសដែលជួយអ៊ុយក្រែនក្នុងការការពារដែនអាកាស។
លោក Macron ក៏បានពិភាក្សាតាមទូរស័ព្ទជាមួយប្រធានាធិបតីអ៊ុយក្រែន Volodymyr Zelenskyy អំពីការបង្កើនការផ្គត់ផ្គង់អាវុធ ការផ្តល់មីស៊ីល និងការផលិតឧបករណ៍យោធារបស់បារាំងនៅអ៊ុយក្រែន។
មេដឹកនាំទាំងពីរក៏បានពិភាក្សាអំពីការស្វែងរកដំណោះស្រាយការទូត និងការផ្តល់ជំនួយហិរញ្ញវត្ថុសម្រាប់ការការពារអ៊ុយក្រែននៅឆ្នាំនេះ និងឆ្នាំក្រោយ។ លោក Zelenskyy បានស្វាគមន៍ការសន្យារបស់បារាំងក្នុងការបង្កើនជំនួយយោធា។
លោក Macron បានអំពាវនាវឱ្យសហគមន៍អន្តរជាតិបន្តដាក់សម្ពាធលើរុស្ស៊ី រហូតដល់ទីក្រុងមូស្គូយល់ព្រមបញ្ឈប់ការប្រយុទ្ធ និងចូលរួមក្នុងការស្វែងរកសន្តិភាព៕
