កាលពីថ្ងៃទី២៤ ខែសីហា សហរដ្ឋអាមេរិកបានសម្រេចដកប្រទេសស៊ីរីចេញពីបញ្ជីប្រទេសគាំទ្រភេរវកម្ម។ ការសម្រេចចិត្តនេះត្រូវបានចាត់ទុកថា ជាជំហានសំខាន់សម្រាប់ស៊ីរី ព្រោះវាអាចជួយបើកផ្លូវឱ្យមានការវិនិយោគ និងការធ្វើអាជីវកម្មនៅក្នុងប្រទេសឡើងវិញ។
ប្រភពពីសារព័ត៌មានReuter។
មុននេះ ស៊ីរីស្ថិតក្នុងបញ្ជីរបស់អាមេរិកតាំងពីឆ្នាំ១៩៧៩ ដែលធ្វើឱ្យការធ្វើពាណិជ្ជកម្ម ការវិនិយោគ និងការភ្ជាប់ជាមួយប្រព័ន្ធហិរញ្ញវត្ថុអន្តរជាតិមានការលំបាក។
រដ្ឋមន្ត្រីការបរទេសអាមេរិក Marco Rubio បាននិយាយថា ការដកឈ្មោះស៊ីរីចេញពីបញ្ជីនេះ គឺដោយសាររដ្ឋាភិបាលស៊ីរីថ្មីក្រោមប្រធានាធិបតី Ahmed al-Sharaa បានបង្ហាញការប្តេជ្ញាចិត្តឃ្លាតឆ្ងាយពីសកម្មភាពភេរវកម្មអន្តរជាតិ។
រដ្ឋាភិបាលស៊ីរីសង្ឃឹមថា ការសម្រេចចិត្តរបស់អាមេរិកនឹងជួយឱ្យប្រទេសអាចទាក់ទាញវិនិយោគបរទេស បើកអាជីវកម្មឡើងវិញ និងស្តារសេដ្ឋកិច្ចដែលរងការខូចខាតយ៉ាងធ្ងន់ធ្ងរដោយសារសង្គ្រាម។
ស៊ីរីក៏បានចាត់ទុកការដកឈ្មោះនេះថា ជា «ឧបសគ្គធំចុងក្រោយ» សម្រាប់ការវិនិយោគ និងការកសាងសេដ្ឋកិច្ចឡើងវិញ។
បន្ទាប់ពីស៊ីរីត្រូវបានដកចេញពីបញ្ជីនេះ ប្រទេសដែលនៅសល់ក្នុងបញ្ជី «ប្រទេសគាំទ្រភេរវកម្ម» របស់អាមេរិកមាន កូបា អ៊ីរ៉ង់ និងកូរ៉េខាងជើង៕
