ការវាយប្រហាររបស់អ៊ីស្រាអែលនៅតំបន់ហ្គាហ្សា បានសម្លាប់ជនជាតិប៉ាឡេស្ទីនយ៉ាងហោចណាស់៧នាក់ និងបណ្តាលឱ្យមនុស្សជាច្រើនរងរបួស។ ការវាយប្រហារបានកើតឡើងនៅតំបន់ Beit Lahiya និង Khan Younis ខណៈស្ថានភាពមនុស្សធម៌នៅហ្គាហ្សាកាន់តែធ្ងន់ធ្ងរ។
ប្រភពពីសារព័ត៌មានAl Jazeera នៅថ្ងៃទី២៦ខែសីហា។
ក្នុងចំណោមអ្នកស្លាប់ មាន៣នាក់ត្រូវបានសម្លាប់ក្នុងការវាយប្រហារលើផ្ទះមួយនៅ Beit Lahiya ខណៈម្នាក់ទៀតស្លាប់ដោយសារការវាយប្រហារដោយដ្រូននៅតំបន់ al-Mawasi ក្នុង Khan Younis។ មនុស្ស ៣នាក់ផ្សេងទៀតបានស្លាប់ដោយសាររបួសពីការវាយប្រហារមុនៗ។
ជាមួយគ្នានេះ ការវាយប្រហាររបស់អ៊ីស្រាអែលមួយនៅពេលយប់ បានបំផ្លាញឃ្លាំងស្តុកសម្ភារៈអាហារូបត្ថម្ភ ដែលមានបំណងផ្គត់ផ្គង់ដល់កុមារ ស្ត្រីមានផ្ទៃពោះ និងម្តាយកំពុងបំបៅដោះកូន។ អង្គការ Medical Aid for Palestinians បានបញ្ជាក់ថា ឃ្លាំងត្រូវបានបំផ្លាញទាំងស្រុង។
ក្រសួងសុខាភិបាលនៅហ្គាហ្សា បានព្រមានថា តំបន់នេះកំពុងប្រឈមនឹងការដួលរលំទាំងស្រុងនៃតម្រូវការចាំបាច់សម្រាប់ការរស់នៅ ខណៈការវាយប្រហារ និងវិបត្តិមនុស្សធម៌នៅតែបន្ត៕
