កងទ័ពអ៊ីស្រាអែលបានបើកការវាយប្រហារតាមអាកាសលើតំបន់ជាច្រើននៅភាគខាងត្បូងប្រទេសលីបង់ កាលពីថ្ងៃទី២៧ ខែសីហា ដោយអះអាងថា ជាការឆ្លើយតបទៅនឹងការបាញ់ដ្រូនផ្ទុកជាតិផ្ទុះចំនួន២គ្រឿង សំដៅលើកងទ័ពអ៊ីស្រាអែលនៅតំបន់ភាគខាងត្បូងលីបង់។
ប្រភពពីសារព័ត៌មានAnadolu Agency។
តាមសេចក្តីថ្លែងការណ៍របស់កងទ័ពអ៊ីស្រាអែល ដ្រូនទាំងពីរត្រូវបានចោទថា បាញ់ដោយក្រុមហេសបូឡា (Hezbollah) ក្នុងអំឡុងពេលយប់។ កងទ័ពអ៊ីស្រាអែលបានបាញ់ទម្លាក់ដ្រូនមួយគ្រឿង ខណៈបាត់ការទាក់ទងជាមួយដ្រូនមួយទៀត ហើយបានអះអាងថា មិនមានទាហានរងរបួសឡើយ។ ហេសបូឡាមិនទាន់ចេញមុខធ្វើអត្ថាធិប្បាយលើការចោទប្រកាន់នេះទេ។
ទីភ្នាក់ងារព័ត៌មានជាតិលីបង់បានរាយការណ៍ថា ការវាយប្រហាររបស់អ៊ីស្រាអែលបានប៉ះពាល់ដល់តំបន់ Nabatieh al-Fawqa និង Arab Salim ដោយមានអ្នករងរបួស។ កងកម្លាំងអ៊ីស្រាអែលក៏ត្រូវបានរាយការណ៍ថា បានធ្វើចលនាជាមួយរថក្រោះ និងគ្រឿងចក្រយោធា នៅជិតតំបន់ Mais al-Jabal ព្រមទាំងមានការបាញ់ផ្លោងទៅលើតំបន់មួយចំនួននៅភាគខាងត្បូងលីបង់។
ការវាយប្រហារទាំងនេះកើតឡើង ខណៈភាពតានតឹងរវាងអ៊ីស្រាអែល និងលីបង់នៅតែបន្ត បន្ទាប់ពីការផ្ទុះជម្លោះជាថ្មីកាលពីខែមីនា៕
