គ្រួសារយ៉ាងហោចណាស់១០,០០០គ្រួសារ ត្រូវបានបាត់បង់ផ្ទះសម្បែង ដោយសារទឹកជំនន់ភ្លាមៗដ៏ធ្ងន់ធ្ងរនៅប្រទេសនេប៉ាល់។
ប្រភពពីសារព័ត៌មានAnadolu Agency នៅថ្ងៃទី២៨ខែសីហា។
មន្ត្រី IFRC បានឱ្យដឹងថា ការជួយសង្គ្រោះ និងការចូលទៅកាន់តំបន់រងគ្រោះមានការលំបាកខ្លាំង ដោយសារផ្លូវ និងស្ពានជាច្រើនត្រូវបានបំផ្លាញ ប្រព័ន្ធទំនាក់ទំនងត្រូវបានផ្តាច់ ហើយសហគមន៍មួយចំនួនអាចចូលទៅដល់បានតែតាមឧទ្ធម្ភាគចក្រ។
មន្ត្រី IFRC ប្រចាំនេប៉ាល់បាននិយាយថា ភូមិ និងផ្សារទាំងមូលមួយចំនួនបានបាត់ខ្លួន ក្រោមឥទ្ធិពលនៃទឹកជំនន់ដ៏សាហាវនេះ។
តាមរូបភាពផ្កាយរណប ទឹកជំនន់អាចបណ្តាលមកពីបំណែកទឹកកកដ៏ធំមួយបានបាក់ចេញពីផ្ទាំងទឹកកកនៅតំបន់ភ្នំហិមាល័យ ប្រមាណ ២០គីឡូម៉ែត្រ ភាគឦសាននៃច្រកព្រំដែន Rasuwa-Rasuwagadhi។ ការបាក់រលំបាននាំយកទឹកកក និងថ្មជាច្រើនតោនធ្លាក់ចូលទៅក្នុងទន្លេ Bhotekoshi បង្កឱ្យមានទឹកជំនន់ភ្លាមៗ និងបំផ្លាញតំបន់សហគមន៍នៅតាមដងទន្លេ។
អាជ្ញាធរ និងអង្គការជួយសង្គ្រោះកំពុងបន្តព្យាយាមទៅដល់ប្រជាជនដែលរងផលប៉ះពាល់ ខណៈទំហំនៃការខូចខាត និងតម្រូវការជំនួយនៅតែត្រូវបានវាយតម្លៃ៕
