ចំនួនអ្នកស្លាប់ដោយសាររញ្ជួយដីដ៏ខ្លាំងនៅប្រទេសឥណ្ឌូណេស៊ី បានកើនដល់១១១នាក់ ខណៈប្រជាជនជាង ១៧៦,០០០នាក់នៅតែបន្តស្នាក់នៅក្នុងជម្រកបណ្តោះអាសន្ន នៅខេត្តEast Nusa Tenggara។
ប្រភពពីសារព័ត៌មានAnadolu Agency នៅង្ងៃទី២៨ខែសីហា។
មន្ត្រីទីភ្នាក់ងារគ្រប់គ្រងគ្រោះមហន្តរាយជាតិឥណ្ឌូណេស៊ី (BNPB) បានឱ្យដឹងថាមនុស្សសរុប១៧៦,៦២១នាក់ ត្រូវបានជម្លៀសទៅកាន់ទីជម្រក បន្ទាប់ពីរញ្ជួយដីកម្រិត ៧.៧រ៉ិចទ័រ បានវាយប្រហារតំបន់នេះកាលពីថ្ងៃទី១៥ ខែសីហា។
ចាប់តាំងពីការរញ្ជួយដីដំបូងមក អាជ្ញាធរបានកត់ត្រា ការរញ្ជួយដីបន្តចំនួន ៨,១៩៣លើក នៅទូទាំងខេត្ត។ ចំនួនអ្នករងរបួសក៏បានកើនឡើងដល់ ១,៦៧៨នាក់។
ប្រតិបត្តិការសង្គ្រោះ និងការចែកចាយជំនួយកំពុងបន្តនៅតំបន់ដែលរងផលប៉ះពាល់ខ្លាំងបំផុត។ ក្នុងនោះមានតំបន់ Labuan Bajo ដែលជាគោលដៅទេសចរណ៍ដ៏សំខាន់របស់ឥណ្ឌូណេស៊ី ហើយរញ្ជួយដីបានបំផ្លាញ ឬធ្វើឱ្យខូចខាត ផ្ទះសម្បែង និងអគារសាធារណៈជាង ៣៦,០០០ខ្នង។
អាជ្ញាធរឥណ្ឌូណេស៊ីកំពុងបន្តផ្តល់ជំនួយ និងស្នាក់នៅបណ្តោះអាសន្នដល់ប្រជាជនដែលបាត់បង់លំនៅឋាន ខណៈការរញ្ជួយបន្តនៅតែបង្កការព្រួយបារម្ភចំពោះសុវត្ថិភាពរបស់ប្រជាជននៅតំបន់រងគ្រោះ៕
