ជនចំណាកស្រុកសញ្ជាតិស៊ូដង់យ៉ាងហោចណាស់៣៧នាក់បានស្លាប់ក្នុងដំណើរតាមសមុទ្រពីប្រទេសលីប៊ីឆ្ពោះទៅប្រទេសក្រិក បន្ទាប់ពីពួកគេបានភៀសខ្លួនចេញពីសង្គ្រាមនៅក្នុងប្រទេសស៊ូដង់។
ប្រភពពីសារព័ត៌មានAnadolu Agency នៅថ្ងៃទី២៨ខែសីហា។
ជនរងគ្រោះរួមមាន ស្ត្រី កុមារ និងគ្រួសារ ដែលបានចាកចេញពីស៊ូដង់ ដើម្បីស្វែងរកទីកន្លែងមានសុវត្ថិភាព។ ក្នុងចំណោមអ្នកស្លាប់ មានទារកអាយុត្រឹមតែ ៧ខែ និងកុមារដែលមានអាយុចាប់ពី ៣ ដល់ ១៦ឆ្នាំ។
ជនរងគ្រោះមកពីតំបន់ជាច្រើនក្នុងប្រទេសស៊ូដង់ ដូចជា El Fasher, El Geneina, Nyala, Gedaref, East Nile និង Babanusa។ El Fasher ដែលជារដ្ឋធានីនៃរដ្ឋ North Darfur ក៏មានជនរងគ្រោះជាច្រើននាក់ផងដែរ។
ស៊ូដង់បានធ្លាក់ចូលក្នុងសង្គ្រាមចាប់តាំងពីខែមេសា ឆ្នាំ២០២៣ រវាងកងទ័ពស៊ូដង់ និងក្រុម Rapid Support Forces (RSF)។ ជម្លោះនេះបានបង្កឱ្យមានវិបត្តិមនុស្សធម៌ធ្ងន់ធ្ងរ ដោយមនុស្សរាប់ម៉ឺននាក់ត្រូវបានសម្លាប់ និងជិត ១៣លាននាក់ ត្រូវបានបង្ខំឱ្យភៀសខ្លួនចេញពីលំនៅឋាន។
ដោយសារសង្គ្រាម អ្នកភៀសខ្លួនស៊ូដង់ជាច្រើនបានស្វែងរកទីជម្រកនៅប្រទេសជិតខាង ខណៈអ្នកខ្លះទៀតបានប្រថុយជីវិតធ្វើដំណើរតាមផ្លូវសមុទ្រមេឌីទែរ៉ាណេ ដើម្បីទៅកាន់អឺរ៉ុប។ ករណីស្លាប់ទាំង ៣៧នាក់នេះ បានបង្ហាញពីគ្រោះថ្នាក់ធ្ងន់ធ្ងរដែលជនភៀសខ្លួន និងជនចំណាកស្រុកស៊ូដង់កំពុងប្រឈមក្នុងការស្វែងរកសុវត្ថិភាព៕
