នៅថ្ងៃទី៣០សីហា ឆ្នាំ២០២៦ ប្រធានាធិបតីបណ្តោះអាសន្នវេណេស៊ុយអេឡា លោកស្រី Delcy Rodriguez បានអះអាងថា ប្រទេសរបស់លោកស្រីនៅតែរក្សា កម្មសិទ្ធិ និងអធិបតេយ្យភាពលើធនធានប្រេង ទោះបីបានព្រមព្រៀងផ្ទេរសិទ្ធិអភិវឌ្ឍប្រេងជាច្រើនទៅសហរដ្ឋអាមេរិកក៏ដោយ។
ប្រភពពីសារព័ត៌មានAl Jazeera។
កិច្ចព្រមព្រៀងដែលលោកស្រីហៅថាប្រវត្តិសាស្ត្រនឹងមានរយៈពេល ២៥ឆ្នាំ និងពាក់ព័ន្ធនឹងការអភិវឌ្ឍប្រេងប្រមាណ ៦៥ពាន់លានបារ៉ែល។ គម្រោងនេះមានគោលដៅអភិវឌ្ឍអណ្តូងប្រេងយុទ្ធសាស្ត្រ ១៧កន្លែង ដោយកំណត់ផលិតកម្មដំបូងប្រមាណ ១.៥លានបារ៉ែលក្នុងមួយថ្ងៃ។
តាមកិច្ចព្រមព្រៀង វេណេស៊ុយអេឡានឹងទទួលបាន ១៩ដុល្លារពីប្រេងមួយបារ៉ែល ដែលផលិត និងលក់ទៅសហរដ្ឋអាមេរិក ដែលលោកស្រី Rodriguez អះអាងថា អាចបង្កើតចំណូលបន្ថែមដល់ប្រទេសរហូតដល់ប្រមាណ ២០៩ពាន់លានដុល្លារក្នុងមួយឆ្នាំ អាស្រ័យលើតម្លៃប្រេង។
រដ្ឋាភិបាលវេណេស៊ុយអេឡានិយាយថា ការចូលរួមរបស់ក្រុមហ៊ុនបរទេស រួមទាំងក្រុមហ៊ុនអាមេរិក នឹងនាំមកនូវទុន បច្ចេកវិទ្យា និងជំនាញ ដើម្បីស្តារឧស្សាហកម្មប្រេងដែលរងផលប៉ះពាល់យ៉ាងខ្លាំងពីទណ្ឌកម្ម។
ទន្ទឹមនឹងនេះ មន្ត្រីវេណេស៊ុយអេឡាកំពុងត្រៀមចុះកិច្ចព្រមព្រៀងថ្មីជាមួយក្រុមហ៊ុនប្រេងមួយចំនួន រួមទាំង Chevron ដើម្បីផ្តល់សិទ្ធិស្វែងរក និងផលិតប្រេងនៅក្នុងប្រទេស៕
