កាលពីថ្ងៃទី៣០ ខែសីហា ឆ្នាំ២០២៦ អ្នកបើកយន្តហោះម្នាក់ដែលត្រូវបានចោទថា ស្រវឹង និងបានលួចយន្តហោះ បានហោះចូលតំបន់ហាមឃាត់ក្បែររោងចក្រថាមពលនុយក្លេអ៊ែរ Paks របស់ហុងគ្រី មុនពេលយន្តហោះធ្លាក់ចុះក្នុងវាលផ្កាឈូករ័ត្ន។
ប្រភពពីសារព័ត៌មានNew York post។
យន្តហោះប្រភេទ Cessna 172 ត្រូវបានរ៉ាដាយោធារកឃើញ បន្ទាប់ពីវាហោះចូលតំបន់ហាមឃាត់ក្បែររោងចក្រនុយក្លេអ៊ែរ ដែលជារោងចក្រនុយក្លេអ៊ែរតែមួយគត់របស់ប្រទេសហុងគ្រី។
ដោយសារយន្តហោះហោះចូលតំបន់មានសន្តិសុខខ្ពស់ កងទ័ពអាកាសបានបញ្ជូន យន្តហោះចម្បាំង ឱ្យចេញទៅពិនិត្យ និងឆ្លើយតបចំពោះហេតុការណ៍នេះ។
អាជ្ញាធរហុងគ្រីបានកំណត់ថា យន្តហោះស៊ីវិលមិនអាចហោះចូលជិតរោងចក្រនេះក្នុងចម្ងាយប្រហែល ៣.២ គីឡូម៉ែត្រ នៅកម្ពស់ក្រោម ២០,០០០ ហ្វីតបានទេ។
ទីបំផុត យន្តហោះបានចុះចតបន្ទាន់ និងធ្លាក់ក្នុងវាលផ្កាឈូករ័ត្ន។ អាជ្ញាធរកំពុងស៊ើបអង្កេតថា តើអ្នកបើកយន្តហោះបានយកយន្តហោះចេញដោយរបៀបណា និងមូលហេតុអ្វីបានជាហោះចូលតំបន់ហាមឃាត់៕
