នៅថ្ងៃទី១ ខែកញ្ញា ឆ្នាំ២០២៦ ចំនួនអ្នកស្លាប់ដោយសារទឹកជំនន់ភ្លាមៗ និងបាក់ដីនៅតំបន់ព្រំដែននេប៉ាល់-ចិន បានកើនលើស ១,០០០នាក់ ខណៈមនុស្សជាង ៤,៤០០នាក់នៅតែបាត់ខ្លួន។
ប្រភពពៅសារព័ត៌មានAnadolu Agency។
នៅប្រទេសនេប៉ាល់ អាជ្ញាធរបានបញ្ជាក់ថា មានអ្នកស្លាប់ចំនួន ៩៨៧នាក់ និងមនុស្ស ៣,៩១៦នាក់បាត់ខ្លួន។ ក្នុងចំណោមអ្នកបាត់ខ្លួន មានជនបរទេស ៥៨៣នាក់ និងបុគ្គលិកនៅតាមស្ថានីយវារីអគ្គិសនីចំនួន ៦៣៩នាក់។
ចំណែកភាគីចិន មានអ្នកស្លាប់ ១៦នាក់ និងមនុស្ស ៥៤៦នាក់កំពុងបាត់ខ្លួន។ សរុបមក ប្រទេសទាំងពីរមានអ្នកស្លាប់ ១,០០៣នាក់ និងអ្នកបាត់ខ្លួនប្រមាណ ៤,៤៦២នាក់។
គ្រោះមហន្តរាយនេះបានកើតឡើងកាលពីថ្ងៃទី២៦ ខែសីហា បន្ទាប់ពីផ្ទាំងទឹកកកនៅភ្នំ Langtang Lirung ក្នុងប្រទេសនេប៉ាល់បានបាក់ បង្កឱ្យមានលំហូរទឹក ភក់ និងថ្មយ៉ាងខ្លាំង ស្រក់ចុះតាមជ្រលងភ្នំ និងបំផ្លាញតំបន់ជាច្រើននៅតាមព្រំដែន។
ប្រទេសចិន ឥណ្ឌា និងកូរ៉េខាងត្បូង បានបញ្ជូនក្រុមជួយសង្គ្រោះទៅចូលរួមស្វែងរកអ្នកបាត់ខ្លួន។ ប៉ុន្តែការងារជួយសង្គ្រោះនៅតែជួបការលំបាក ដោយសារផ្លូវខូច ភូមិសាស្ត្រលំបាក និងហេដ្ឋារចនាសម្ព័ន្ធជាច្រើនត្រូវបានបំផ្លាញ។
អាជ្ញាធរនេប៉ាល់កំពុងស្នើសុំឧបករណ៍ និងបច្ចេកវិទ្យាបន្ថែម ដូចជា ឧបករណ៍ធ្វើតេស្ត DNA ដ្រូន និងបច្ចេកវិទ្យាស្ទង់ពីចម្ងាយ ដើម្បីជួយស្វែងរកអ្នកបាត់ខ្លួន និងកំណត់អត្តសញ្ញាណសាកសព៕
