នៅថ្ងៃទី៣ ខែកញ្ញា ឆ្នាំ២០២៦ ប្រទេសហ្វាំងឡង់បានចាប់ផ្តើមសមយុទ្ធការពារជនស៊ីវិលដ៏ធំមួយ ដើម្បីត្រៀមខ្លួនទប់ទល់នឹងវិបត្តិធ្ងន់ធ្ងរ ដោយមានមនុស្សជាង២,០០០នាក់ចូលរួម ក្នុងនោះមានអ្នកស្ម័គ្រចិត្ត និងនិស្សិត ចូលរួម។
ប្រភពពីសារព័ត៌មានAP។
ក្នុងសមយុទ្ធនេះ អាជ្ញាធរបានប្រើជម្រកការពារដែលជីកចូលក្នុងថ្ម ហើយត្រូវបានរចនាឡើងដើម្បីការពារប្រជាជនពីការវាយប្រហារដោយ អាវុធនុយក្លេអ៊ែរ ឬជីវសាស្ត្រ។ ទាហានក៏បានពាក់សម្លៀកបំពាក់ការពារ និងវាស់កម្រិតវិទ្យុសកម្មផងដែរ។
សមយុទ្ធនេះកំណត់សេណារីយ៉ូថា ហេដ្ឋារចនាសម្ព័ន្ធសំខាន់ៗក្នុងទីក្រុង Kuopio ដូចជា អគ្គិសនី និងទឹក ត្រូវបានរំខានដោយការវាយប្រហារតាមអ៊ីនធឺណិត ខណៈមានការគំរាមកំហែងពីការវាយប្រហារដោយមីស៊ីលពីប្រទេសជិតខាង គឺ រុស្ស៊ី។
នៅក្នុងជម្រកការពារ ដែលជាធម្មតាប្រើជាសាលកីឡា មនុស្សរាប់រយនាក់ត្រូវបានរៀបចំឱ្យស្នាក់នៅលើគ្រែបណ្តោះអាសន្ន ដើម្បីសាកល្បងសមត្ថភាពរបស់ប្រទេសក្នុងការការពារ និងជម្លៀសប្រជាជន ប្រសិនបើមានវិបត្តិធ្ងន់ធ្ងរកើតឡើង៕
