ប្រធានាធិបតីចិន លោក ស៊ី ជីនពីង កំពុងរៀបចំនាំគណៈប្រតិភូធុរកិច្ចធំមួយ ដែលមានមេដឹកនាំក្រុមហ៊ុនចិនជាច្រើនរូប ទៅជាមួយលោកក្នុងដំណើរទស្សនកិច្ចទៅកាន់ទីក្រុងវ៉ាស៊ីនតោន ដើម្បីចូលរួមកិច្ចប្រជុំជាមួយប្រធានាធិបតីអាមេរិក លោក Donald Trump នៅថ្ងៃទី២៤ ខែកញ្ញា។
ប្រភពពីសារព័ត៌មានCNA នៅថ្ងៃទី៥ខែសីហា។
ការនាំមេដឹកនាំក្រុមហ៊ុនចិនទៅជាមួយក្នុងចំនួនច្រើនបែបនេះ គឺមិនសូវជាកើតឡើងញឹកញាប់ទេ។ ប្រភពពីរបានឱ្យដឹងថា គោលបំណងមួយគឺចង់បង្ហាញថា ចិននៅតែចង់ពង្រឹងការវិនិយោគ និងពាណិជ្ជកម្មជាមួយសហរដ្ឋអាមេរិក។
ទន្ទឹមនឹងនេះ ចិនក៏អាចប្រើការចូលរួមរបស់ក្រុមហ៊ុនធំៗ ដើម្បីផ្តល់ឱកាសឱ្យរដ្ឋាភិបាលអាមេរិកទទួលបានលទ្ធផលផ្នែកសេដ្ឋកិច្ចខ្លះៗ មុនការបោះឆ្នោតពាក់កណ្តាលអាណត្តិរបស់អាមេរិក។
ទោះជាយ៉ាងណា ទំនាក់ទំនងពាណិជ្ជកម្មរវាងប្រទេសទាំងពីរនៅតែមានភាពតានតឹង។ សហរដ្ឋអាមេរិកបានដាក់ពន្ធ ១០០% លើរថយន្តអគ្គិសនីនាំចូលពីចិន ហើយក៏បានរឹតបន្តឹងលើផលិតផល និងក្រុមហ៊ុនបច្ចេកវិទ្យាចិនមួយចំនួន ដោយលើកឡើងពីបញ្ហាសន្តិសុខជាតិ។
ប្រភពក៏បានបញ្ជាក់ថា មិនទាន់ដឹងច្បាស់ថា មេដឹកនាំក្រុមហ៊ុនចិនណាខ្លះនឹងចូលរួមក្នុងគណៈប្រតិភូនោះទេ៕
